Despues del dezayuno riko del otel, salimos a las mueve de la demanyana para iyir vijitar Midyat ke es un distrikto (ilçe) de la sivdad Mardin.
En primero mos fuimos a ‘Midyat Konuk Evi’ ke es un otel ke se topa en el sentro de Midyat; uno de los mas emportantes egzempyo de edifisyo arkitektural.
Es konstruizado kon pyedras kortadas (kesme taş), ande puedemos ver una rikeza de broderiya sovre las eskaleras, los balkones i las kamaretas.
Es un edifisyo de kuatro etajes, ke tyene una struktura istorika (tarihi yapısı).
En el kuatren etaj un panorama formidable, ke me sinti en Yerushalayim ande puedemos ver; de una parte la partida vyeja, de la otra la partida mueva de la sivdad. Aki tuve el mizmo sentimyento, de pueder ver la sivdad entera de dos partes diferentes. Para los edifisyos de Midyat; se utilizo pyedras kalkeres ke se pueden formar muy fasilamente.
Abashimos del kuatren etaj para iyir kaminar las kazas istorikas de Midyat ke son konstruizadas en las kalejas estrechas. Lo mas emportante en estas kazas es; ke son kazas orijinales ande es brodado enriva las pyedras; la Kerensya i la Pas.
Komo las pyedras se pueden kortar fasilamente; no es problem de azer broderiyas sovre eyas.
Las kayes estrechas son freskas los enveranos i apiyadan a las personas de la kalor fuerte, i son kayentes en invyerno. La puerta de la kaye es simple, el lado de ariva es en forma de arko (kemer).
El arte emportante en Midyat; es el arte de ‘Telkari’ ke el senso es; el arte de brodar la plata.
Kon un enstrumento spesyal i kon un tel u dos teles de plata u de oro; se trikota en la mano i se produiza aniyos, kolyes, eskuralichas i otros objetos.
Despues del komer de midi en una rezidensya (konak) istorika vijitimos el monasteryo de; ‘Mor Gabriel Manastırı’.
Este monasteryo es el mas vyejo en el mundo de los Suryanis Ortodokses. Tyene una istorya de 1.600 anyos. Los edifisyos del sinken syeklo, los mozaikes del tyempo de los Bizantinos, kon las puertas i los domos (kubbe), tyene una grande emportansa istorika.
El Monasteryo es akseptado por la eglisya komo el sigundo Yerushalayim. En mizmo tyempo este monasteryo era el sentro de la sensya (ilim) por los Suryanis. Munchos relijyozos kristyanos, papazes, fueron edukados en esta eskola ke es el monasteryo.
Mos metimos al kamino para vijitar Hasankeyf; ke es un distrikto (ilçe) istoriko de la sivdad Batman; ke kon el rio de ‘Dicle’ se separo en dos partidas.
La istorya de este distrikto es de 10.000 anyos.
Hasankeyf esta en perikolo porke; keren azer
Aya el ‘Baraj de Ilısu’; i este distrikto va kedar debasho las aguas en peryendo todo el tresoro kultural ke tyene.
Si este baraj se konstruiza; los perikolos del entorno va ser muy danjerozo.
Eliminar la rasa de las beemas, despareser los alimentos,
La muerte de los peshkados muchedumbre (kitlesel balık ölümleri),
La kalitad de la agua va aminguarse,
La pujita de la hazinura malarya (sıtma); ke el orijen (kaynak) de esta hazinura es la agua,
La pujita de los pletos entre la Turkiya kon los estados vizinos sovre la agua,
El ponte ke se konstruizo en el bodre del rio Dicle; las kazas, las meskitas, el bazar estan atirando la atansyon de las personas vijitando este lugar grasyozo.
Bevimos el kafe spesyal de la rejyon i mos metimos al kamino para iyir a Diyarbakır.
Arivimos a las mueve de la noche, el personel del otel mos estavan asperando para sirvir el komer de la noche. Era alhad el 17 del mes mayo ke era mi aniversaryo.
Todos ya estavamos kansoz del dia entero, unas kuantas personas ya se estavan alevantando para iyir tomar un banyo i echarsen.
En supito, mi marido Meir; ampeso a avlar komo mos konosimos en İsrael, ke ay munchos anyos ke mos kazimos, veramente una avla muy sentimental.
A la fin un gato grande kon kandelas, i todos kantando ‘Happy Birthday’. Me emosyoni muncho; i este viaje fue una sorpreza para mi; para selebrar mi dia de nasimyento kon el grupo de 40 personas de ‘Alef’.
Syempre ke tengamos keridos lektores; dias de selebrar evenementos orozos.
A kontinuar…
