El rolo del mesenato en la evolusyon de la kultura

Klara PERAHYA Judeo-Espanyol
3 Haziran 2015 Çarşamba

La fotografia ke se topa mas arriva es karakteristika i mizmo probante del rolo benefiko del “Mesenato”(proteksyon de los artes, letras i syensyas) en la evolusyon i el enrezyamyento de la kultura.

En esta fotografia vemos: un chiko grupo de profesores ke transmeten la savedurisya a sus dishiplos i dos mesenas Selim Salti de la Universidad ‘Bar İlan’ de Tel Aviv, i Yehoram Gaon de la Universidad ‘Ben Gurion’ de Bersheba, dos ombres ke grasyas a sus jenerozidad (produkto de sus lavoro personal) partisipan a realizar i enrezyar la transmisyon del Judeo-Espanyol/Ladino muestra lingua ethnika, la kuala a una epoka no muy leshana fue el objekto de un terrivle prejudisyo  ke konsiderava ‘el fakto de emplearla’ komo una dekadensya sosyal.

No mos olvidaremos ke una lingua no es solo un medyo de komunikasyon entre varyos individuos de una mizma sekta, eya es tambyen portadora de una historya, ansi ke de la sensibilidad de un grupo de personas ke munchas vezes bivyeron, pensaron i se revoltaron kaji endjuntos afin de no sometersen a una fatalidad obskura.     

Kon razon, ay de esto unos kuantos anyos, uno de los ansyanos prezidentes de la İnstitusyon UNESCO avia dicho: “La muerte de una lingua es syempre un emprovesimyento del patrimonyo intelektual de la humanidad”.    

La fotografia ke se topa djusto en riva de este chiko teksto reprezenta  tambyen un simbolo de lo ke es en realidad la esensya del djudiazmo, echa simultaneamente de progreso kontinuo en la esfera del adelantamyento i tambyen de solidaridad sinsera entre humanos; me akodro aver meldado ke en las famiyas poderozas djudias del pasado era de uzo de protejar los elevos de sentros rabinikos afin ke alkansen a los mas altos grados.

A este mizmo sujeto, todos konosemos el dinamizmo de Selim Salti  syempre afektivamente atado a muestra komunidad i a la lingua ke fue la de muestros aguelos. Despues de aver kumplido estudyos de ekonomia i djornalizmo, el eskrivyo en varyos periodikos de la epoka i tambyen (byen entendido) en el semanal Şalom, antes de instalarse por un syerto tyempo en Evropa i  mas tadre por syempre en Israel ande komo profesyon el se okupo de aktividades komersyales.

El fue syempre un grande filantropo fokalizado partikolarmente sovre el dezeo de permeter a estudyantes meresyentes de ir lo mas leshos posivle en sus formasyon kultural, i desde el anyo 1980 a una epoka ande el no se avia ainda establisido definitivamente en el Estado Hebreo, el empeso a distribuir ‘bekas universitaryas’ a estudyantes meresyentes de Israel afin de darles la posivilidad de pushar lo mas leshos posivle sus formasyon superyor i entre eyos “Shmuel Rephael” el kual parvino a obtener el Doktorato.

Ansi kuando mas tadre, en el anyo 2003, muestro ansyano konsivdadino pudo avrir, grasyas a su jenerozidad, debasho el nombre de ‘Yeoshua Selim & Naime Salti’ un İnstituto de dos katedras de Ladino/Judeo Espanyol en la prestijyoza Universidad Bar Ilan de Tel-Aviv,su direksyon fue asumida de parte del Prof. Dr. Shmuel Raphael.

El segundo Dr. Honoris Causa de la fotografia es “Yehoram Gaon” ke nasyo en 1939 en la Palestina de entonses debasho el mandato britaniko. Su padre orijinaryo de Makedonia ‘Moshe-David Gaon’ era un historyano byen konosido ansi ke un profesor de hebreo byen reputado en Palestina i tambyen en Buenos Aires i en İzmir ande enkontro ‘Sara Hakim’ ke poko mas tadre devia ser su mujer i la madre de sus ijos.

En el anyo 1957 Yehoram Gaon empeso una karera artistika ke lo rendyo muy selebre simultaneamente en su kualidad de kantador i de aktor. “Sus grandes performansas en el kampo muzikal komo tambyen teatral” atraktaron progresivamente la atensyon de selebres kompozitores komo tambyen de un publiko de mas a mas ancho. El fue mizmo eskojido en kualidad de muzisyano durante la seremonia de atribusyon del “Premyo Nobel” a Yitzhak Rabin, Shimon Peres i Yaser Arafat, en Stokholm.

En mizmo tyempo ke su grande valor artistika, uvo syempre en su  programa de vida de ayudar sus proksimos en sus evolusyon kultural, lo ke izo de el ‘una de las grandes figuras İsraelyanas’ ke simboliizan la solidaridad interhumana.

En este momento, el es syempre un grande artisto i en mizmo tyempo  un grande luchador para aktivar la evolusyon del patrimonyo lenguistiko de la populasyon Sefarad.

Tanto ke avra personas ke ayudaran a realizar el enfloresimyento intelektual de otros ke si mizmo, personas ke akseptaran de ir mas leshos ke sus ’Ego’ afin ke otros tambyen ayegen a un objektivo luminozo, no muerera la verdadera sivilizasyon.