Un viaje kon el Grupo Alef

Şeli GAON Judeo-Espanyol
27 Mayıs 2015 Çarşamba

La semana ultima profitimos de un dia de vakansa kon mu marido para azer un viyaje kurto, ma muy reushido; al Sud Oryente de la Turkiya kon un tur organizado por una asosyasyon de muestra komunitad.

Kon el avyon de las syete de la demanyana, mos fuimos a Mardin; una sivdad muy poplada i ke se topa en la zona del Rio ‘Dicle’. Un otobüs konfortable vino para tomarmos kon el giador (rehber) endjuntos, estavamos 40 personas. En primero siguramente ya teniyamos konosidos entre la djente, ma aviya i personas ke no konosiyamos en el grupo. Ma esto no fue un problem; porke en kuatro dias mos izimos komo ermanos.

La primera istasyon fue; “El Monasteryo DEYRULZAFARAN” ke es el simbolo de la arkitektura i de la kultura multikolor de Mardin.

El Monasteryo se konstruizo en el sinken syeklo despues de Jésus. Es un monasteryo emportante de los ‘Suryanis’. La eglisya Mor Hananyo (Kubbeli Kilise), La Kaza de los Santos (Azizler Evi), i El Monasteryo de Sol (Güneş Tapınağı), son los edifisyos (yapı) de este monasteryo. Lo mas emportante es ke ay 52 simeteryos de los Patrikes Suryanis. Todos los Suryanis del mundo entero vijitan aki para orasyonar. Las kolonas arkaikas, las broderiyas de mano i las broderiyas de las pyedras estavan koza de ver… Oy mizmo este monasteryo es uno de los sentros relijyozos emportante de la Eglisya de los Suryanis.

Despues vijitimos la Eskola Relijyoza İslamika de Kasımiye (Kasımiye Medresesi) en Mardin, ke se konstruizo en el anyo 1469. Es uno de los mas grandes edifisyos de Mardin, i es organizado en el doredor de un kortijo (avlu) solamente. 

Tyene una istorya de 700 anyos i una arkitektura magnifika dekorada de broderiyas; en las paredes de la eskola ay semboles sovre la Astronomiya i la Sensya de la Medikeriya (tıp bilimi).

El chorro de agua koryente es el simbolo de la Vida de la persona, de kuando nase fina la muerte.

La agua ke esta salyendo de la fuente es el Nasimyento, ande se esta vazyando es la Manseves, el kanal delgado, largo reprezenta la Maturidad (olgunluk), i las aguas ke se estan arrekojyendo en una pisina grande, reprezentan la Eternidad. Mas despues esta agua se transfera a la tyerra kon los kanales, i se arribive de muevo.

Es una ovra maestra (şaheser); ke se kombino kon el simbolismo vinido de la “Asya Santral (Orta Asya) kon la filozofiya İslamika.”

Mardin es una de las sivdades las mas vyejas de la Mezopotamya; i aki bivyo munchas sivilizasyones vyejas diferentes. Sakıp Sabancı Mardin Kent Müzesi; este museo tyene komo buto de azer konoser la formasyon de la sivdad (kentsel oluşum), i de ekspozar la kultura de la vida de la sivdad Mardin. Despues la vijita de este museo mos fuimos a komer por midi.

Las kazas de Mardin, los edifisyos diferentes son atados los unos kon los otros; kon kalejas estrechas, kon eskaleras kon munchos eskalones i kon pasajes (geçit) avyertos enriva ke se dize: “Abbara.”

Las paredes en el entorno de las kazas son kuatro metros de altura para pueder protejarlas del klima duro de la sivdad.

Todas son konstruizadas kon las pyedras amariyas de kalker ke se pueden formar i adonarsen. Los tavanes altos, las kazas son yeladas en enverano, i kayentes en invyerno.

La partikularidad la mas emportante de las kazas de Mardin es el lavoro de mano de las pyedras (taş işçiliği).

Kırklar Kilisesi es una eglisya emportante de los Suryanis Ortodoxes ke tyene munchas puertas de 400 anyos de tavla (ahşap), en el kurtijo ancho la torre kon la kampana (çan kulesi), i en kada lugar la ermozura de las pyedras brodadas komo dantela.

Kuarenta reprezenta los martiryos de gerra (şehit) Kristyanos. En el anyo 1170, los guesoz (kemik) de estos 40 martiryos de gerra se trusheron a esta eglisya.

La noche mos yevaron a una rezidensya (konak) istorika,  ande komimos kumidas tradisyonales de la rejyon.

Los servidores sirvyendo los platos kon guantes blankas.

Una rezidensya mistika ke la patrona; una mujer ermoza baylando kon la muzika ke aviya.

Lo ke mos plazyo lo mas fue; ke los garsones baylando;  estavan sirvyendo las kumidas savrozas i kon kara riyente.

Bayles orijinales i ke de muestro grupo uvo mujeres i ombres ke partisiparon a los bayles. Una nochada alegre i reushida.

Keridos lektores, va kontinuar a darvos detalyos sovre el sigundo dia, la semana vinidera.

A kontinuar…