La komunidad djudia de Estanbol se topa una vez mas realsada por muestro korelijyonaryo Sami Kohen elkual fue de muevo distinguido de parte de la direksyon del byen konosido diaryo “Milliyet” por su fidelidad i sus aktivos servisyos rendidos sin interrupsyon durante 60 anyos a la dicha Gazeta.
Kon sus artikolos kaji kotidyanos sovre la politika estranjera de la Turkia i sus analizis profundas i byen estrukturadas de las varyas situasyones politikas al nivel internasyonal, Sami Kohen renforso en la Prensa Turka el sistema muy provechozo de largos konsilyabules amigavles kon komentadores ajenos, lo ke jeneralmente anchea enormamente la vizyon i la komprensyon de varyos akontesimyentos.
Grasyas a su konosensya perfekta de varyas linguas ajenas tal por seguro el İngles, el Franses i supozo el Espanyol, el pudo tener a la favor de largas entrevistas kon personajes estranjeros ke okupan postos importantes en sus payis, konversasyones o mizmo diskusyones, lo ke por seguro avre horizontes muevos a kualkyer intelektual ke save oir i deduzir.
Komo lo disho un filozofo fransez (si no me yero Boileau) “del choke de ideas sale la luz” / Du choc des idées jaillit la lumiere.
En todo kavzo, penso ke el es uno de los primeros myembros de muestra komunidad a aver echo (syempre debasho su nombre de nasimyento “Sami Kohen”) un paso de esta importansa en el ‘periodizmo’ Turko.
Ay de esto 70 anyos muestra kolektividad era mas atraktada por la ‘Ekonomia’ i tambyen ‘la Medikeria’ ansi ke ‘el Derecho’ i a un grado mas flako por la İndjenyeria, la Kimika, o byen la Biolojia etc...
Oy, esta mizma komunidad tyene tambyen en varyos grandes periodikos myembros influentes, tal: Solly Özel en el diaryo i posto de Televizyon “Haber Türk” i “Gila Benmayor” en el byen konosido periodiko kotidyano “Hürriyet”. İ en literatura: “Maryo Levi”, “Liz Behmoaras” i otros ke son muy apresyados al nivel nasyonal del payis.
İgualmente muestra kolektividad tuvo ay de esto 20 o25 anyos, un Grande Profesor de Universidad en la ”Esfera Juridika kon “Selim Kaneti”. De mezmo en la Karrera Universitarya de Medikeria se ve grandes nombres entre los kualos: el Profesor “Moise Bahar” i “Nil Molinas Mandel”; lo mizmo en psikolojia kon “Norma Razon” entre otros, sin olvidarmos de Moise Eskenazi i Yomtov Garti en Matematika.
En desparte de las syensyas mensyonadas mas arriva, un muy grande adelantamyento se produzyo en la aktividad artistika ande grandes realizasyones fueron i son syempre kumplidas.
Si... unos kuantos anyos despues la Segunda Gerra Mundyal se produzyo komo una mueva eklozyon de la manseves djudia de muestra komunidad, de dia en dia mas dinamika i mas sensivle a lo ke se pasa i se aze en su entorno, lo ke provoko en eya no solo un grande enrikesimyento intelektual, ma tambyen el dezeo de personalmente partisipar.
No se puede nyegar ke en este momento egziste en muestra komunidad una ardor de mas a mas intensa de partisipar al enfloresimyento del Payis ande nasimos i fuimos edukados.Malorozamente no tengo la posibilidad de nombar todos los ke realmente tyenen la kualidad nesesarya para ser sitados, i esto por faltura de espasyo en esta unika pajina ke fue atribuida al djudeo Espanyol.
