Akodrar i no olvidar nunka

Şeli GAON Judeo-Espanyol
29 Nisan 2015 Çarşamba

Antes una semana; komemorimos muestros sej milyones de ermanos ke se muryeron en la Sigunda Gerra 

Mondial. Esta komemorasyon fue en la sinagoga Ashkenaz kon munchos partisipantes.

Lo ke me emosyono lo mas fue; la desizyon del Presidente de muestra Komunitad İshak İbrahimzadeh; ke onoro diferentes partes de la komunitad en abrasando (kucaklamak) a todos sin apartamyento (ayırım), yeno de kerensya.

Un egzempyo; la primera kandela fue asendida siguramente kon el Grande Rabino İsak Haleva endjuntos kon Süzet Sidi; una Ermana ke dyo su vida entera para el Holocaust, en meldando munchos livros sovre este sujeto, en dando konferensyas en las universitades de Estambol, de Ankara i diferentes paises del mundo entero, interviews kon Elie Wiesel, kon los testiguos (tanık) de la Shoa, i aklarando los mansevos ke no kale olvidar esta katastrofa inimajinable…

La sigunda kandela fue asendida kon Shai Cohen ke es el konsul de İsrael, kon el ambasador Ertan Tezgör, la tresera kandela fue asendida por el presidente de muestra komunitad İshak İbrahimzadeh kon Sami Erbesh ijo de Gila i Berti Erbesh, la kuatrena fue asendida por Benyamin Poluman kon el ambasador autrishyano (Avusturya) Klaus Wolfer, la sinkena fue asendida kon el presidente de la fondasyon (vakıf) Neve-Shalom Daryo Katalan kon una de las pansyoneras Rashel Kalderon de Or-Yom, i la de alkavo fue asendida por Jak Sevgi kon el Dr. Umut Uzer.

Es por la primera vez ke esta seremonia de las kandelas

fue akumplida de esta manera; i aki kero felisitar al presidente, de la buena idea ke tuvo sovre este sujeto.

El; abraso a todos los djudyos; mansevos, hazinos, grandes, aedados, sin mirar el nivel ke tyenen, solamente por ke son personas ke apartyenen a muestra komunitad.

“Kol Akavod” Kerido Presidente…

Myerkoles ultimo asistimos a la komemorasyon de la revolta del ‘Getto de Varsovie’ en la sinagoga de Neve-Shalom, kon muncha djente.

La seremonia fue larga ma muy emosyonante i muy byen organizada. A la entrada los mansevos dando takyas a los ombres, i mansevas distribuando fulares de kolor blanko i blu; kolores de la bandyera İsraelyana kon shadayes enriva.

Todos kon las takyas i fulares en muestros ombros entrimos aryento. 

A la entrada de Neve-Shalom, una ekspozisyon sovre ‘La Shoa’ aparejada por los mansevos sensivles ke dan una grande emportansa a este sujeto.

Despues las orasyones de Minha, Aşre, Amida pasimos a la seremoniya de las kandelas ke ampeso kon el Grande Rabino, i kontinuo kon el konsul.

Rav David Sevi kon su boz de seda izo las ashkavaz ke estava muy triste, i un poko despues todos los raves, hazanes se vistyeron vistidos blankos i se ampeso a la seremoniya de ‘Yom Haatsmaut’ kon grande entuzyasmo (coşku).

En supito remarkimos antorkas (meşale) en las kuatro partes de la sinagoga; ande se mete rozas en las bodas.

Las kuatro partes del kal se allumbro kon las antorkas.

En la grande almenara (avize) en medyo del kal estava enkolgado un Shaday grande.

El konsul Shai Cohen izo una avla sensera en dizyendo ke; Ia popülasyon de Israel oy es de 8.300.000 personas, ke a parte de 1.700.000 etranjeros todos son djudyos emigrados de las kuatro partes del mundo.

“Lo ke es emportante es; ke la mas grande partida de los etranjeros son los arabos ke estan muy orozos de bivir aki kon mozotros endjuntos. Mozotros tenemos las puertas avyertas a todos los djudyos del mundo entero.

Israel mizmo ke es un pais chico muy adelantado sovre la teknolojiya, sovre el komputer, sovre las deskuvyertas (buluş) muevas emportantes etsetera…

Israel oy es un pais fuerte i no kere kontinuar a gerrear i a peryer mansevos presyozos. Los paizes del Medyo Oryente (Ortadoğu) no lo pueden desdenyar i no deven de pensar su disparisyon.” 

A la fin de su avla emosyonante; los ijikos izyeron las orasyones, i a la fin las ‘Estreyikas D’Estambol’ kon kantikas diferentes, mos alegraron i todos mozotros abashimos al Sentro Kultural de Neve-Shalom para komer los tratamyentos aparejados por ‘La Casa Catering’.

El spektaklo folkloriko aparejado por los mansevos de la organizasyon ALEF fue muy reushido.

La nochada se termino kon un gato savrozo i un bayle dalkavo kon la partisipasyon de todos ke se kedaron fina la fin.

Keridos Lektores; kero felisitar en primero; al presidente de Neve-Shalom kon su ekipa de dirijentes por el orden i la organizasyon de la sinagoga, despues a los mansevos ke aparejaron este dia lavorando de alma i korason, las kantikas de las Estreyikas, i a todos los partisipantes del mas grand fina el mas chiko ke kon sus asistensyas mostraron sus sensibilidades a la komemorasyon i a la fyesta de Yom Haatsmaut.

“El Dyo ke mos ayege para kada anyo Amen…”