Komo por seguro todos ya lo meldariash en la prensa de la semana pasada, despues la muerte de 700 migrantes undidos en la mar Mediteranea i los multiples nofrajes presedentes de vyejas maonas yenas de ombres i mujeres ke kerian fuyir la prekaridad de sus propyo payiz ande eyos eran sometidos a la krueldad salvaje de dirijentes i shefes sin piadad ni eskrupulo, un grande Kongreso fue organizado kon la partisipasyon de numerozos Estados Evropeos, ke tenia komo prinsipal objetivo de akudir la mas parte de estos desmazalados.
A la salida de la konferensya en kestyon, el Prezidente Franses François Hollande deklaro presizamente ke los ke eran prezentes en esta reunyon kayeron de akordo de enforteser las posibilidades i los medyos aktuales de ayudo afin de parvenir djustamente a salvar lo mas ke se puede de estos desdichados kompletamente desmamparados, i en este buto, multiplikaron por tres la suma de moneda ke era konsakrada anteryoramente a semejantes operasyones de salvamyento
En la prensa franseza, varyos editoryalistos mas o menos septikos formularon sus dubyo konsernando el rezultado de la dicha konferensya ke eyos puede ser toparon problematiko i sometido a la insertidumbre de los dias a venir.
İnevitavlemente, en este momento, la Evropa parese toparse konfrontada a dos diferentes alternativas de las kualas las solusyones relativas seran fatalmente kontraryas la una a la otra.
La primera, la mas urjente, es: “El reflekso humanitaryo de kada dirijente sivilizado de kerer salvar lo mas posivle de personas ke se topan en reziko de muerte imminente”, lo ke inkontestavlemente es una repuesta kargada de humanizmo dada a la desgrasya de las trajedias maritimas ke de dia en dia devyenen de mas a mas frekuentes. Reflekso bendicho ke provablemente es la suma de preseptos morales transmetidos de jenerasyon a jenerasyon en una epoka anteryor a la muestra ande kualkyer amenaza de vengansa o de voluntad absoluta de venser el otro no se manifestava kon la mizma vigor ke vemos aktualmente.
La otra, la segunda solusyon es, eya: “el reflekso esta vez instinktivo inevitavle de autodefensa ke kualkyer individuo mizmo muy byen pensante puede tener delantre la posibilidad de aktos kriminales ke algunos de estos migrantes puedran perpetrar, pushados por sus manera de ver el mundo i de djuzgar las kozas.
Dos situasyones diferentes echas de elementos hipotetikos ke ninguno puede totalmente konfirmar ni nyegar, situasyones sometidas al hazardo de los akontesimyentos a venir.
Ansi una kestyon obsedante mos persigue: “Ke sera el futuro de la Evropa ke fue (i en munchas sirkunstansyas es ainda) el manadero de la sivilizasyon aktual i de su humanizmo?
