Myerkoles la noche, vamos komemorar (tal ke lo azemos kada anyo) la desgrasya de la destruisyon integral de los Ghettos de Polonya ansi ke la muerte atros i barbara de miles i miles de muestros ermanos, ombres i mujeres, mansevos i ninyos matados de una manera monstruozamente inhumana.
Unos a unos, los nombres de las aglomerasyones de djudyos ke fueron destruidas por syempre seran repetados: ‘Auschwitz’, ‘Belzec’, ‘Chelmno’, ‘Majdanek’, ‘Sobibor’, ‘Treblinka’; nombres ke deven kedar inkrustados en muestra memorya en sinyo de respekto por sus sufriensa, lakuala rezume a eya sola lo ke (en el silensyo de un entorno indiferente o byen puede ser simplemente paralizado por el espanto) fue la inkonmensuravle desgrasya de la Shoah.
Durante estos largos dias de ambrera i sufriensa ke fue la Shoah, la dolor no fue sola fizika ma tambyen moral. En los kampos de konsentrasyon, kuando vian ‘grupos de kompanyeros de sala’ yevados a los ornos krematoryos, los ke kedavan ya savian ke en poko tyempo iva ser sus torno...
Uvo mizmo despues la fin de la gerra, en las raras personas ke pudyeron salvar realmente de la ferosidad de esta epoka inhumana, un djenero de sentimyento de kulpabilidad sin razon de versen bivos i libres kuando miles i miles de otros muryeron.
Elie Wiesel en uno de sus livros tyene eskrito estos pokos byervos ke ekspresan un djenero de remorso ke syempre kedara en su korason. “Je vis donc je suis coupable: si je suis encore vivant c’est parce qu’ un ami, un camarade ou un inconnu est mort a ma place” (Bivo, dunke so kulpavle. Si ainda ‘yo so bivo’ es porke un amigo, un kompanyero o byen un ombre ke no konosko muryo a mi lugar).
‘Myerkoles venidero a la noche” en mizmo tyempo ke la Evokasyon de este terrivle suplisyo de muestros korelijyonaryos, sera tambyen la Reminisensya de un un Akto Sublime “la Revolta del Ghetto de Varsovia”, akto de bravura de unos kuantos mansevos djudyos ke todo en savyendo ke no tenian ninguna posivilidad de venser, refuzaron de murir sin luchar i se batyeron kon furor malgrado la enorme inegualidad de fuersas.
Eyos, kon las pokas armas ke se topavan en sus poder, rezistyeron kontra un enemigo super-armado ke los golpeava syegamente i se esforsava de destruirlos.
La Shoah no fue solo un krimen kontra el djudaizmo, ma kontra la Humanidad entera en su humanizmo, un krimen kontra la grandor de ser ‘kriansas pensantes’ konsyentes de sus prezensya en un mundo ke, aun fujitivo, mos da la posibilidad de deshar una trasa detras de mozotros.
Segun una chika bushkida ke ize: ‘Malgrado el triste rezultado de esta rebelyon, el impakto moral i historiko de la Revolta del Ghetto de Varsovia fue de una importanse preponderante. Los luchadores djudyos ya savian ke la fin iva ser trajika para eyos, eyos no dubyavan ke (salvo una o dos eksepsyones) ninguno puedia salir bivo... sus objetivo no era de salvar sus propya vida… Lo ke eyos kerian salvar era “la Dinyidad Djudia”.
Ay de esto unos kuantos anyos, en su livro entitulado ‘Regards sur une tradition’ (Mirada sovre una tradisyon) el selebre eskritor André Neher avia dicho: “El Djudaizmo es la sola doktrina de la kuala el mundo tyene menester para ‘sinyifikarse oy’ i ‘orientarse amanyana’: el sekreto de Auschwitz i el sekreto del Estado de İsrael‘.” (Le Judaisme est la seule doctrine dont le monde a besoin por se signifier aujourd’hui et pour s’orienter demain: le secret d’Auschwitz et le secret de l’Etat d’Israel).
En efekto despues la segunda gerra mundyal, paralelmente al sentimyento de dolyo ke kedara syempre bivo en el korason de kada djudyo, se desperto tambyen en el: ‘la voluntad imperativa de afirmar su prezensya i tambyen sus derechos’.
Devemos akseptar de mezmo ke despues la Segunda Gerra Mundyal uvo igualmente un djenero de despertadura de la konsyensya de munchos dirijentes de puevlos ajenos ke avian kedado silensyozos sin intervenir ni pronunsyar la mas chika protestasyon, kuando filas i filas de viktimas djudias eran pushadas en direksyon de los ornos krematoryos.
La Revolta del Getho de Varsovia no fue solo una pajina doloroza del destino djudyo, ma tambyen el egzempyo de “un akto de bravura i de respekto de si mizmo” kumplido en un estado de total lusididad.
