En mis dos primeros artikolos avli del Prof. Müftüoğlu en sitando su fraza. “Kon la edad ampesa problemas konsernando la Memorya”.Eskrivi bastante sovre estos problemas a la luz de las enformasyones ke tomi del Psikologo D.A. Ma, teniya otruna kestyon importante ke syempre me intrigo. Un problema konsernando una amiga muy kerida.
Relati el kavzo asigun me lo konto mi amiga: 17 Agosto 1999… Estavan en un otel no muy leshos de Estambol. El tablo final ke se akodra de akeya noche es ke serro la T.V a las 24.00 i se echo…05.- 06 demanyana la primera vizyon en su memorya fue una munchidumbre de personas en el Lobby, enfrente la T.V i eya tambien sintyendo las novelas…
Se akodra ke a un momento eya disho: “Ooo ke desgrasya! al pareser ke uvo una rash terrivle en algun lugar!!” i la djente mirandola de una manera toaf, komo una kriansa de otra planeta. (esta es la ekspresyon de mi amiga). Egzaktamente akel momento realizo tambien ke todos en el Lobby estavan kon pijamas, robe de shambre ets…Ma, eya estava vestida komo salir a la kaye. Las yaves del oto, de kaza i otras chikas kozas menestorazas en la sakosha. Fue mas despues ke supo el telefon de su ija dizyendole en panik: “abashad a la guerta a pye, no kon asansor..”.
Keridos amigos, despues de kaji 16 anyos, oy en diya eya no se akodra nada del momento de terretemblo, komo fue, komo se vistyo, kualo disho ets…Konsulto psikologos ke le konsejaron de ir al otel, suvir a la mizma kamareta, lo ke izo unas, dos vezes. Ma no tuvo dinguna reaksyon, dingun shok. El verdikto unanimo de los doktores fue: “Amnésie Partielle”.
Sovre esto ke le konti, el doktor D.A me respondyo: “Este djenero de kavzos se enkontro despues de la Sigunda Gerra, espesyalmente en los sovrebivyentes del Holokosto. Este olvido es una manera de immediata ”Reaksyon Protektrisa”del meoyo ke refuza de enrejistrar los momentos de fuerte terror o de panik komo en el kavzo de tu amiga. Asigun lo ke kontates, por unos, kuantos minutos eya no peryo su sangre friya myentres de la Rash i esto es un kavzo reelmente enteresante i muy ralo”.
Nturalmente ke todos dezeamos konservar una buena memorya. Antes un syerto tyempo tengo eskrito tambien sovre el problema “olvido” i los kaminos de impedirlos. A lo menos de los chikos olvidos de kada diya i de kada uno de mozotros. Eran komo suggestyones de profesyonales, konsejos ke portanto konosemos ma, ke mos haraganeyamos muy frekuente de pratikar.
Aki, unos, kuantos ke me kedaron en memorya. Por egzempyo, un espesyalisto disho: “La persona no es ovligada de rememorarse todo. Espesyalmente en avansando de edad esto deviene mas difisil. Dunke, no agash esforso para akodrarvos todo uno por uno.”
En esta kategoriya puedemos sitar numeros de telefon, adresos, datas en vezes importantes, komo aniversaryos, diyas espesyal ets... Para akodrarmos, tenemos la “gia telefonika, un karne de adresos i de otras informasyones ets... Yo syempre pensi ke el akodrar estas kozas importantes o no, es kestyon de “organizasyon”.
Ansi, por egzempyo si tenesh echos, komo “randez-vous” en el doktor o una importante reunion, devesh notar las datas en el kalendaryo o lo mas fasil, apegar uno o dos “Post-it” en la puerta de la buzyera. Tambien, se puede azer lo mizmo si tenesh de azer el “shopping”. Lo mijor es azer una lista , si no keresh tener una sorpreza en arrivando a kaza.Keridos amigos, tengo i otros konsejos, ma no espasyo sufizente.No kero abuzar. HAG SAMEAH.
