Difisil viktorya de Benyamin Netanyahu

Klara PERAHYA Judeo-Espanyol
25 Mart 2015 Çarşamba

Una antigua dicha latina dize “Vox Populi vox Dei” (la boz del puevlo es la Boz de Dyo) eya es la voluntad de la mayoria de los sitizanos de un payis en sus konviksyones i sus vizyon del futuro, delantre un mundo ke parese pedrer kada dia mas su koezyon i su ekilibro.

En la antiguedad, estas palavras fueron la primera manifestasyon ansi ke ‘el elemento de baza’ de la verdadera demokrasia i ainda esto es valide.

Martes  demanyana de la semana pasada, sovre baza del rezultado jeneral de los varyos sondeos ke pudyeron ofisyalmente kontinuar asta 3 dias antes la eleksyon  lejistativla de İsrael, la mayoria del mundo djudyo estava konvensida de un primer triumfo  de İsaac Herzog prezidente del partido del ‘Sentro de la Syedra İsraelyana’ nombrado “Unyon Sionista” ke paresia tener el avantaje de pueder resivir 4  bozes de mas ke su adversaryo Benyamin Netanyahu.

El programa  elektoral de la “Unyon Sionista”  todo en syendo muy konsernado por la seguridad de İsrael, es tambyen partikolarmente bazado sovre el objektivo de realsar el nivel ekonomiko de la klasa menesteroza i de anchear lo mas posivle la klasa medyana, grasyas a desizyones governomentales ke puedran (a lo menos parsyalmente) rezolver el problema  de la karestia de los produktos de komanya i prinsipalmente de moradas.

Martes la noche grande sorpreza! La  eleksyon lejislativa antes mizmo su klotura  se  afirmo ser anchamente en favor de Benyamin Netanyahu. El sera la primera persona a la kuala el Prezidente del Estado Hebreo “Reuven Rivlin” demandara de formar una koalisyon ke asegurara el futuro del muevo governo i su libertad de trasar el programa de baza de lo ke sera la politika del payis.

Komo todos ya lo savemos, el thema prinsipal de la kampanya elektoral de Netanyahu fue syempre “La seguridad de Israel a  ke presyo ke sea” lo ke todos apruvamos de una manera absoluta, i tambyen (komo un segundo thema) la afirmasyon, de una manera intermitante, ke durante su mandato no avra un Estado Palestinyano.

Ke se paso en estos tres dias  ke sigyeron la klotura ofisyal de los sondeos? ke faktor preponderante provoko este realsamyento evidente del prestijyo de Netanyahu?

En esta ultima eleksyon syertos otros partidos politikos de la ‘Syedra’ komo de la ‘Derecha’ ganaron igualmente muevos votos, a la eksepsyon  del partido “Meretz” de la Syedra ekstremista  ke pyedro (komo ya se asperava) unas kuantas bozes i de mezmo (lo  ke fue una sorpreza) de dos otros partidos esta vez de la ’Derecha’ ke  asta poko antes eran muy atados a Benyamin Netanyahu, tal ke fue el kavzo  de “HaBayit  haYehudi” formasyon ke tyene komo shefe Naftali Bennett  i de ’İsrael Beitenu’ debasho la prezidensya de Avigdor Lieberman. Ansi la viktorya elektoral de Benyamin Netanyahu prezenta munchos faktos fasiles o difisiles a entender segun las personas...

En desparte de esto, una situation de fuerte tensyon  parese  instalarse entre İsrael i los payizes Oksidentales, partikularmente los Estados Unidos, a la sigida  de las deklarationes del Kapo del Liikud  el kual (durante su kampanya elektoral) signifiko kon grande frekuensa ke tanto ke el sera en el poder no avra  kreasyon de un Estado Palestinyano.

Malgrado esto, komo es el uzo, el Prezidente Amerikano Barak Obama telefono a Benyamin Netanyahu para felisitarlo todo en reafirmando kon fuersa su dezeo de una solusyon ke komportara dos Estados, el uno Hebreo el otro Palestinyano.

Es ke Israel korye el risko de pedrer sus aliados indefektivles de syempre? Segun lo ke eskrive el diaryo elektroniko ‘Le Point’, djueves pasado, los Estados Unidos informaron ke sus pozisyon en la ONU puedra trokar konsernando la politika de İsrael  al kual (asta oy) eyos akordavan otomatikamente sus apoyo.

Koinsidensya o reaksyon pozitiva, kaji en mizmo tyempo ke la deklarasyon del prezidente Amerikano Barak Obama, el mizmo Benyamin Netanyahu deklaro no ser  kontraryo a muevas negosyasyones entre İsrael i los dirijentes Palestinyanos.

De su parte “BAN Kİ MOON”  Prezidente de la ‘Organizasyon de las Nasyones Unidas’ (ONU) ‘demando a Netanyahu de repetar publikamente esta mizma deklarasyon.

P.S. Desde Lunes 23/3/2015, Benyamin Netanyahu ya tuvo la konfirmasyon de su viktorya kon un total de 67 bozes en su favor sovre 120 ke komporta el parlamento İsraelyano, grasyas a los votos de los myembros de “Israel Beitenu” i de “Kulanu’ ansi ke de dos formasyones ultra relijyozas: el ‘Shass’’ i la ‘Lista Unifikada de la Torah’’ ke se adjuntaron a los del Likud.