Segun lo ke meldimos estos ultimos dias en la prensa i komo algunos de muestros lektores se akodraran por seguro: ay de esto mas de 32 anyos, en el mez de agosto 1982, fue perpetrado en el selebre sentro komersyal djudyo de Paris nombrado Rue des Rosiers, el primer akto kriminal kontra el djudaizmo, por 3 Palestinyanos ke izyeron eksplozar una grenada en el restorante Goldenberg, atake antisemite ke avia provokado la muerte de 6 personas i ferido krualmente 22 otras, kaji todas djudias.
Entonses este krimen no fue revendikado de parte de ningun partido palestinyano i ansi la Djustisya Franseza lo atribuo al grupo Abou Nidal sin pueder arrestar los kulpantes. İ es muncho mas tadre ke en el anyo 2011, el djuzgo antiterroristo Marc Trevidic identifiko dos de los matadores, de los kualos no se pudo obtener la ekstradisyon.
Oy, poko mas de 32 anyos mas tadre, los tres asasinos pudyeron ser kompletamente situados, el uno se topa en el Norte de la Evropa i los dos otros: uno en Palestina, el otro en Jordania.
De otra parte, sin ningun raporto kon el primer kavzo, en los Estados Unidos el 4 del mez koryente, empeso el procheso de Dzhokhar Tsarnaev, estudyante en medikeria akuzado de aver personalmente partisipado al atentado kriminal del Marathon de Boston en el anyo 2013, akto no solo asasino ma tambyen absurdo ke avia kavzado la muerte de 3 personas i avia ferido gravemente kaji 264 otras .
Su defensa fue asumida por la avokata “Judy Clarke”, lakuala, se entyende byen, tyene komo solo objetivo de salvar el kulpante de la pena de muerte. Ansi eya no nyega la horrivle evidensya del kavzo ni la gravedad de la kulpa, ma fokaliza todos sus esforsos sovre la posibilidad de salvar su kliente del terrivle kastigo ke ainda oy es syempre inflijido en unos kuantos Estados de la Amerika del Norte.
La thezis de la defensora repoza dunke prinsipalmente sovre un argumento de baza el kual insiste ke el kulpante fue influensado de una manera irrezistivle por su ermano mayor muncho manko instruido i manko asimilado a las leyes i konsepsyones del payis ande se topavava i ke fue matado durante la persigua de la polisia, pokas oras despues el fakto.
El 4 del mes koryente, desde el prinsipyo del debate delantre la korte, la avokata disho lo sigyente:“ en los dias vinyentes vamo todos ser konfrontados a una insuportavle dolor kavzada por una kuantidad de aktos sin razon a los kualos partisiparon de una manera horrivle dos ermanos”
Se puede fasilmente entender ke a ningun momento eya no va penar a nyegar la atrosidad del akto kriminal ma simplemente a konvenser el prokurador responsavle de la akuzasyon, “ ke antes de todo kale bushkar el ‘deke’ del fakto” bushkar lo ke pudo pushar este estudyante en medikeria ke fue un ekselente elevo (syempre muy amigavle kon sus kompanyeros de klasa en el liseo komo tambyen en la Universidad) a perpetrar un semejante krimen.
Me akodro ke munchos djornalistos avian avlado tambyen de un djenero de mensaje topado en la embarkasyon ande Dzhokhar Tsarnaev se avia eskondido durante la persigua polisyera, un mensaje ande estava eskrito lo sigyente: “El governo amerikano mata muestros siviles inosentes... Mozotros muzulmanos semos un solo puerpo, si azesh mal al uno de entre mozotros, mos azesh mal a todos...ansi evita de matar muestros inosentes i mozotros entoses mos kedaremos de kometer semejantes aktos”.
Estranya koinsidensya vizivlemente sin ningun raporto kon el procheso de Boston, antes unos kuantos dias, la Prensa mos ambezo ke un adjente de kuero blanko de la polisia de Ferguson mato (se puede pensar por ekseso de prudensya) un adolesente preto responsavle de una simple infraksyon a la ley, sin ke este polisyero sea kulpabilizado, evento por el kual uvo enormes manifestasyones de protestasyon de una mayoria de sitizanos pretos komo blankos, lo ke al pareser provoko un dezeo mas rigorozo de mentener delantre la Djustisya una igualidad absoluta entre individuos de diferentes orijenes.
Tres kavzos ke realmente meresen refleksyon.
