Purim alegre, ke ‘el Sehel’, ‘la Paz’ i ‘la Djustisya’ reynen enfin en el mundo. Amen!

Un muzeo de arte antiguo salvajemente sakeado en Irak. Eske la sivilizasyon mundyal se topa debasho una amenaza difisil a venser?

Klara PERAHYA Judeo-Espanyol
3 Mart 2015 Salı

Desde un syerto tyempo todo afirma kel objektivo prinsipal de los djihadistos es prinsipalmente de destruir las raizes mizmas de la sivilizasyon afin de revenir a los tyempos leshanos de los primeros dias de la kreasyon del mundo, epoka ande no egzistian ni el progreso syentifiko, ni la sagasidad, ni mizmo el humanizmo; un mundo sin ‘la deklarasyon de los derechos del ombre’ i sin el mas chiko esforso de estableser kualkyer prinsipyo de  djustisya o de  realizar la mas chika aspirasyon artistika.

Vos akodrash por seguro de la destruisyon de las Torres del  ‘World Work Center’, simbolo inkontestavle de la opulensya ekonomika universal, trajedia ke kosto la vida a aproksimativamente 3000 personas… Vos akodrah puede ser tambyen de ‘las presyozas estatuas  reprezentando Buddha’ rompidas sin ezitasyon ni remorso antes unos kuantos anyos, de parte de los Talibanes. Aktualmente es un muzeo de ovras artistikas  antiguas  ke fue sakeado brutalmente en Irak por los myembros mizmos del IŞİD/EI.

El ‘Prof. Malek Chebel’ selebre  antropologo aljeryano dize: “Para los fundamentalistos ay un solo ‘Ser’ ke egziste: ‘Allah’ , lo resto no reprezenta nada. En eyos no ay ningun respekto por el Arte  ni por la Sivilizasyon. Mos topamos delantre personas ke biven  kompletamente ahuera de la realidad del mundo kontemporeano, mos topamos delantre personas ke keren retornar a los primeros dias del Islam”. (fin de sitasyon)

En desparte de esto, la Prensa Internasyonal  esta de mas a mas pesimista por la situasyon jeneral del mundo; al pareser muevas nuves pretas se estan akumulando sovre un futuro no muy leshano. Las relasyones entre el mundo oksidental i el mundo djihadisto devyenen de dia en dia mas kargadas de odyo  de parte de los ekstremistos, loskualos (referandosen al Koran) van asta kerer eliminar de una manera krual kualkyer persona ke pensa de una manera kontrarya a sus prinsipyos.

De otra parte, los esforsos aunados de las Fuersas Aeryanas Amerikanas i Evropeas no parvyenen a realmente  venser la armada djihadista IŞİD/EI en Irak, la kuala parese ser invensivle  porke kompuesta de luchadores de una rezistensya individual ekstraordinarya, pushados por la sertitud absoluta ke en sus kualidad de eroes ‘es el ganeden’ ke los aspera en una vida otra ke la terrestre...

 Liberados de kualkyer dubyo o temor, sodros a argumentos  otros ke sus propya rezolusyon de erradikar absolutamente el enemigo, nada parvyene a  arrestar estos gerreadores ke tyenen  un solo objektivo: ‘murir por sus ideal’, sin la mas chika konsiderasyon por lo ke esto  kostara a sus propyo patrimonyo humano.

En los ultimos atakes kriminales en Fransya, Beljika, Danemarka o kontra gazeteros inglezes, el fakto el mas sorprendyente (i por seguro el mas dolorozo) fue ke munchos fueron perpetrados por  ’ijos’ o ‘inyetos’ de los primeros imigrantes  asiatikos i afrikanos venidos en Evropa despues la segunda gerra mundyal, mansevos ke nasyeron i tuvyeron la posibilidad de frekuentar las mizmas  eskolas ke los ijos i inyetos de los orijinaryos İnglezes, Fransezes o Beljes… komo si (en el korso de los dias ke pasaron) se produzyo en eyos un djenero de enfortesimyento  de sus devosyon  por los  tekstos relijyozos de los primeros tyempos, sin kerer ver ni akseptar la evolusyon del mundo ke los entorna.

Ke fue el faktor desizivo de esta radikalizasyon progresiva de sus devosyon al pareser irrezistivle por los preseptos djihadistos en el  subkonsyente de munchos de estos adolesentes  ke apartyenen a famiyas mas o menos laikas? Ke ‘influensa negativa a kualkyer evolusyon’ pudo tener el poder irrezistivle de azerles eskojer el odyo i no la amistad? la gerra i no la paz? la muerte i no la vida?