Repuestas del Gran Rabbino de Fransya Rav Haim Korsia a las kestyones de un gazetero

Klara PERAHYA Judeo-Espanyol
25 Şubat 2015 Çarşamba

Alhad pasado (dia ande jeneralmente me desido  sovre kual tema eskrivir mi artikolo semanal en esta pajina del Salom), dos sujetos se prezentaron kon fuersa a mi esprito. El primer: ‘lo ke el Gran Rabbino de Fransya Haim Korsia  pensa de la situasyon aktual de los djudyos en la Evropa’…el segundo: ‘la konkluzyon del procheso avyerto antes tres anyos kontra Dominique Strauss Khan  por ‘prostitusyon grave’.

Byen entendido, ‘la opinyon del grande Ombre Relijyozo djudyo  konsernando el avenir  del djudaizmo en el Kontinente Evropeo i partikularmente en el payis ande  fue realizada la ‘Deklarasyon de los Derechos del  Ombre’ tuvo sin ezitasyon la prioridad,

En repuesta a la primera kestyon del djornalisto a este mizmo sujeto, el Gran Rabbino Rav Haim Korsia, kapo de la mas grande komunidad djudia de Evropa, yamo kada uno de sus korelijyonaryos a ‘Ser el guardyen de sus ermanos’  (Sois le gardien de ton frere), seas vijilente por ti mizmo i tambyen por los otros ke ti.

 ‘Ser el guardyan de su ermano’  es ser solidaryo i mizmo responsavle del otro, es salir del  estado de kaji indiferensya ande envezes mos topamos i de ayudar este “otro”.  ‘Ser el guardyan de su ermano’  es el kudyo ke deve tener kada uno por sus semblavles en rompyendo el sirkulo de  egosentrizmo en el kual varyas personas se topan desgrasyadamente enkarseladas.

Para el Shefe espiritual djudyo de Fransya, la laisidad no es la negasyon de la relijyon, eya es la libertad, para kada uno, de praktikar los preseptos de su Fey relijyoza asta el punto ande esto no afekta la libertad de los otros.

Rav Haim Korsia dize ke ‘bivir endjuntos’ deve pusharmos a bushkar un djenero de kohezyon . No semos una sosyedad monolitika ma una komunidad de sitizanos diferentes en sus puntos de vista relijyozos i filozofikos, kon syempre la esperansa de ayegar en el futuro a un  punto de entendimyento resiproko. 

A la kestyon de djornalisto: ‘Ke es vuestra opinyon sovre el antisemitizmo ke de muevo reaparese? el mizmo Gran Rabbino respondyo en referandose syempre al mensaje bibliklo –Ser kontinualmente vijilente--. “No mos olvidaremos la eksperyensa de muestros aguelos, loskualos al presyo mizmo de sus sangre se avian esforsado i ansi se avian ambezado a entender la sinyifikasyon de las mas chikas vibrasyones  de la sosyedad ke los entornava.

El  Estado  Fransez metyo muncho tyempo asta oyir los sinyos prekursores ke anunsyavan la situasyon aktual, ma agora la voluntad politika de muestros dirijentes de luchar kontra  el mal es inkontestavle. El muevo paso a azer en este momento es la partisipasyon de todos los sitizanos. Ke kada uno devenga‘el guardyen de su ermano”.

Konsernando la pregunta del gazetero al sujeto de las multiples  yamadas del Primer Ministro İsraelyano Benyamin Netanyahu a los djudyos de Evropa de emigrar en Israel, aun ke varyos responsavles dezean dizir: ‘Kedaremos en Evropa, aki  es muestra vida’, Rav Haim Korsya  disho: “Esto lo repetamos syempre… los djudyos de Fransya figuran en la Historya Franseza, eyos praktikan un djudaizmo ansestral. Rashi ke permetyo a los djudyos del mundo entero de entender la Torah i el Talmud, bivyo en Troyes ay de esto mas de mil anyos … Si kualkyer de muestros korelijyonaryos de Fransya eskoje espiritualmente i libremente, kon serenidad, de azer aliyah, es formidable; ma esto no deve ser  un djenero de fuyida, lo ke entonses sera una trajedia’’.

En efekto, aun ke ainda soplan olas del vyejo antisemitizmo kristyano de los siglos presedentes, se syente aktualmente en el esprito de la mayoria del puevlo autoktono la konviksyon ke ningun mal puede vinir de la populasyon djudia de sus payis i mizmo munchos dirijentes konsideran ke “la Fransya no seria lo ke es sin la prezensya de los djudyos”.

Arrondjado durante siglos i siglos de varyos lugares por razones sin baza konkreta, el puevlo djudyo supo syempre adaptarse a muevas situasyones, el sintyo syempre el ovligo de ser en mizmo tyempo util i vijilente. Este esforso fue byen entendi muy difisil a azer i mizmo muy dolorozo ma el enfortesyo el esprito de muestros padres en sus manera de pensar i en sus vizyon del Universo.  

En el antisemitizmo aktual ay sovre todo komo un selo ansestral de personas ke no reusheron eyas a adaptarsen al ritmo ni a las egzijensyas de la epoka aktual.