Los filmos projektados en los Festivales de Filmos Judios en munchos payises del mundo

Muestro amigo Dr. Seyfi İşman, es el promotor de filmos interesantes projektados en Estambol. Le devemos un grande rengrasio ke aksepto, sovre mi insistensia, de eskrivirmos en judeo-espanyol por la primera vez

Esti SAUL Judeo-Espanyol
18 Şubat 2015 Çarşamba

Hegkom (Hahambaşılık Eğitim Komisyonu) mostra 4 o 5 filmos al anyo ke son projektados en los Festivales de Filmos Judios en munchos payises del mundo.

- El primer filmo de este anyo fue dado en el mez de novembre kon el titulo “Aftermath - Consecuencias”

Kuando se afronta kon la istoria, i si la realita viene komo un espejo,.kale preguntar si la konsiensia va ser limpia. Es kon estas frazas ke el produckor del filmo “Consecuencias”, Dariusz Jablonski, dize esto al puevlo Polako i sigue en diziendo.”No devemos tener espanto de la realita”

Malorozamente este filmo esta mostrando el antisemitismo ke egziste en Polonya mizmo agora.

- El sigundo filmo ke se projekto era sovre la demanda del Konsul Israeliano Shai Cohen, ke se intitula “Farewell Baghdad- Adios Baghdad”.

Este anyo fue komemorado los 65 anyos ke los Judios fueron ekspulsados de los payises arabos komo Ejipto, Irak, Yemen, Siria, ets.

Todos estos Judios abandonaron todos sus bienes en estos payises i vinieron a Israel. No teniendo la mizma kultura, sin saver la lingua, penetraron en una komunidad ashkenazi, ma se integraron en poko tiempo kon grandes difikultades. De otra parte los Palestinianos ke abandonaron Israel, konosiendo la mizma lingua, el arabo, de tener la mizma mentalita i la mizma kultura kon los visinos arabos de Israel, no pudieron integrarsen i dainda no se integraron, achakes del dinero ke viene de los payises de Evropa, porke no les konviene. Fue Shimon Peres ke presento este filmo en Tel Aviv i fue distribuado en todo el mundo para ke la djente konoska las realidades.

- El treser filmo ke se mostro fue “Pour une Femme - Por una Mujer”. El filmo fransez realizado por Dianne Kurys.

Este es un filmo autobiografiko ke rakonta la istoria de amor entre sus parientes i ke mos eksplika una organizasion sekreta, klandestina de los Judios ke lucharon kontra los nazis despues la Segunda Gerra Mondial.

Despues de estos filmos, avlamos sovre eyos i la djente da sus opiniones i ansi el filmo deviene mas agradavle.

Para pueder partisipar a estos evenimientos, kale seguir las anunsias del Gran Rabinato.

Va aver otros 2 filmos fista la fin de la sezon, Filmos Judios i Israelianos ke ganaron premios en festivales.