Otruna vez sovre los anyos

Coya DELEVİ Judeo-Espanyol
1 Şubat 2015 Pazar

Ya es verdad ke en el korso de los anyos mos estamos desvelopando seya fizikamente, seya mentalmente. Engrandesyendomos,  estamos ganando konosensyas, eksperyensas, ansi ke sezudeza. Deotra parte, los anyos,  avagar, avagar estan azyendo sus lavoros de… destruksyon. Naturalmente es imposivle de detener el tyempo ke pasa. Lojikamente no puedemos kedar mansevos. Ma, biyolojikamente lo puedemos, a lo menos en una mezura. Puedemos konservar muestra sanedad fizika i mental. Antes de todo la salud... No penso dar konsejos sovre las maneras de konservarla. Ya devesh saverlo todos!.. Yo personalmente, en la luz de syertas eksperyensas, esto en pozisyon de pueder insistir sovre la valor de la salud. Alora, devemos byen emplear kada diya de muestra vida i valorizar afilu kada kada momento. Devemos valorizarlos i profitar de eyos. Ke manera? Es un poko difisil de dar una kurta repuesta.

Un proverbo Ekosezo  dize: “Las personas pensan ke en bivyendo se envejesen. Ma, es en NO bivyendo ke se azen vyejos...” Ay muncho de komentar sovre esta dicha, ke dizish?... Yo lo ize a mi modo, i esto kontente. Asigun dishimos, es imposivle de impedir la “fuyida” de los anyos. Ma los puedemos arresivir kon amor, kon kerensya, kon muevas esperansas. Las personas ke saven kerer, ke saven partajar kon amistad, ke syempre tyenen esperansas en sus korasones, kedan mansevos. Partajar los rekuerdos, las emosyones, las alegriyas ansi ke las penas... Lo mas importante, partajar las eksperyensas ke ganamos en el korso de los anyos.

Oy, muestros ijos, inyetos, grasyas a la teknolojiya, alkansan a todo modo de informasyon. Ma esto nunka sera igual a las eksperyensas de los aedados, a las lisyones ke se toma de los yerros en kada etapa de la egzistensya. Egzaktamente komo dize la kantika: “I know what it is to be young, but you don’t know what it is to be old...”  Yo ya se lo ke es ser mansevo, ma tu no saves kualo es ser aedado...”  Otruna ermoza fraza ekspresando un mundo de kozas.

Entrar en anyos, bivirlos, ma ke manera? Travarte a un kanton, kon el preteksto ke entonses no sos mansevo? O dezir komo ekskuza: “Ya paso de mi, a esta edad kualo puedo azer?!!”. Si estas en buena salud, la vejes no deve ser un preteksto,  para estar inaktivo. A lo menos un “hobby” , puede ser el byenvenido en los anyos maturos de retreta. Yo penso ke seya la manseves, seya la vejes son nosyones relativas, ke se pueden komentar de diversos modos.

Ay mansevos de 45-50 ke se syenten aedados. Par kontra ay otros ke kontinuan de una manera a ser aktivos mizmo a los 70-80. Tuve la shans i la onor de konoser nombrozos de estas personas. Tuve la felisidad de konoser de serka a syertos ke konosiya solo de nombre, a traverso sus lavoros o eskritas.

Orozamente, se ke ay amigos, amigas de mi jenerasyon ke pensan komo mi. Mos konosemos o no, ke importa? Basta ke sepamos ke tenemos el mizmo buto, ke estamos azyendo muestro posivle para reushir, kon el amor de muestra Lingua i Kultura. Estamos perkurando a konservarlas i desharlas a muestros inyetos... En esta lucha, estamos ombro kon ombro, kon mansevos tambyen. Tengo la esperansa ke eyos, ansi ke syertos de las futuras jenerasyones van a kontinuar a luchar. 

Si, ser aedados es una nosyon  relasyonada  kon la data de nasimyento eskrita en muestra karta de identitad, esto no tiene dinguna importansa para mozotros. Porke tenemos el privilejyo de posedar presyozos rekuerdos, eksperyensas de vida adjuntados kon una grande tolerensya i sezudeza.