Refleksyones de una vyeja mujer

Klara PERAHYA Judeo-Espanyol
10 Aralık 2014 Çarşamba

Komo lo savemos todos, el mundo oksidental se topa aktualmente en rebuelta, kaji a mitad undido en las olas tumultuozas de un universo ke parese ir en direksyon de un destino imprechizo.

En varyas partes de los Estados Unidos la polisia devino de una severidad feros kuando se trata de kulpantes o no kulpantes de kuero  preto, komo una leshana reminisensya de los tyempos pasados ande los migrantes afrikanos eran konsiderados komo esklavos. 

Tal un ritual salvaje ke revyene a un ritmo de mas a mas frekuente, en el Yemen dos muevos rehenes (entre los kualos el uno es amerikano) fueron kruelmente eksterminados.

En la Siria i el Irak las komunidades Kristyanas i la populasyon de orijen Yezis son a mitad masakradas.

En Fransya i la İngiltera es kaji una invazyon de parte de varyas populasyones de orijen ajena, de laskualas syertos myembros se asimilan perfektamente al nivel de adelantamyento, kultura i esprito demokratiko del payis, ma tambyen de una kuantidad ke va malorozamente kreshendo de individuos pushados por un instinkto asasino, kaji jeneralmente  antisemito.

Ainda la semana pasada, lunes el primo del mez koryente, en Creteil-Val de Marne, muy serka del sentro de Paris, dos muevos kazados djudyos fueron no solo agresados i kombriolados en sus propya kaza, ma tambyen immobilizados, los brasos atados i la mujer violada por tres bandidos, kada uno la kara invizivle debasho un largo kapushon i las manos eskondidas en un par de guantes afin de no deshar detras de eyos ningun indisyo.

La reaksyon  del Governo Fransez fue immedyata... El prezidente de la Republika  François Hollande denunsyon el karakter inyovle de esta agresyon ke tenia komo objetivo de molestar i arrebashar dos inosentes por kavza de sus konfesyon... El primer Ministro Manuel Valls deklaro  ke la lucha kontra el antisemitizmo  deve ser  un kombate de kada dia ... i  el Ministro del İnteryor Bernard Cazeneuve ekspreso immedyatamente su indinyasyon i indiko el karakter klaramente antisemito  de este akto kriminal.

Eske estas tres deklarasyones van abatir i venser el aborresimyento de dia en dia mas profundo de una partida de la populasyon asiatika o afrikana kontra el puevlo el mas antiguo de la tyerra?

Poko despues la inyovle trajedia, la Polisia arresto tres personajes dubyozos fuertemente sospechados de pueder kumplir un semejante akto. No savemos si son los reales kulpantes, ma en todo kavzo (es lo ke es) esto no mos dara la real solusyon del inmenso problema ke desde siglos amenaza muestro puevlo.

Kaji simultaneamente kon el drama ke se produzyo en Creteil, en los baryos Palestinyanos de Yerushalayim-Este, muevos asaltos se produzyeron munchas vezes mortales, produkto esta vez de una revolta empapada de aborresimyento kontra la populasyon djudia.

 De otra parte el Governo Israelyano el mizmo en difikultad, alesho de su asemblea dos presyozos myembros: la Ministra de la Justisya ‘Tzipi Livni’ i el Ministro de Finansas  ‘Yair Lapid’ al profito (se supoza) de un partido relijyozos ultra nasyonalisto, esto afin de eliminar kualkyer opozisyon a las desizyones ke kere tomar la mayoria del kabineto.

 El Dyo Baruhu ke no  mareye  los ke tyenen en mano el destino de Israel i les aga ver mas leshos kel dia de oy!

 A este propozito, una kestyon: -- Es ke “una absoluta homojeneidad de pensamyento i un konsensus immedyato fasil a obtener” son syempre  la buena solusyon?

Ay kavzos ande la opozisyon se aze interrogasyon, esta kontinual interrogasyon del puevlo djudyo eternalmente en una situasyone ambivalente ande la insertidumbre i la prudensya lo ovligan munchas vezes a renovelar sus desizyones.