‘LİMMUD’ es un festival de kultura ke se organizo la semana ultima en la eskola Ulus Musevi Lisesi en Estambol.
Es el dyezen anyo ke se esta organizando en una manera perfekta; en reushendo a trayer personas etranjeras i del pais mizmo; profesores, ambasadores (elçi), jurnalistos, istoryanos, akademisyenes de grande valor, emportantes en sus espasyos, mansevos aktivos en sus echos i dando la emportansa menesteroza a todos los detalyos.
La sinyifikasyon de ‘LİMMUD’ es; ambezar, estudyar.
El buto es; ambezar kon la partisipasyon de la persona, i dar la okazyon de developar muestra identitad.
‘LİMMUD’ ambeza a los partisipantes a partajar la konosensya, sin asperar nada del den frente. Developa la identitad djudiya i arrezya (güçlendirmek) la kultura. Es una kollektivitad de estudyo.
El festival ampeso kon un kokteyl shabat la noche.
‘Liyat Barbut’ izo una avla de avyertura (açılış konuşması) en turko i en ingles. Despues ‘Clive Lawton’ avlo de la emportansa del Limmud, i kualo se puede azer mas para atirar los mansevos i para ke seygan aktivos.
Alhad demanyana la primera konferensya ke asisti fue la de ‘Rıdvan Akar’, un jurnalisto konosido ke eskrivyo en jurnales i en revistas (dergi) diferentes, ke tyene un nombre bastante de livros ke eskrivyo i ke agora a kavza de la politika esta sin echo. El sujeto fue; el respekto, la konsiderasyon enverso la medya i la publisitad. Ke todo depende del governo, ke no se puede eskrivir todo lo ke es djusto i dizir sus ideas personales.
La sigunda konferensya era de mi amiga kerida ‘Süzet Sidi’, ke kon su saverisyo de profesora de 30 anyos, mos dyo a entender la relasyon ke ay entre:
“Un kuento (öykü), una Sinfonia (senfoni) i un Filmo”.
Eya avlo sovre el eskrivano Alman ‘Thomas Mann’ ke gano en 1929 el Nobel de la Literatura. El fue ovligado de emigrar kon su mujer i ermano en 1911 a Venedik a la isola Lido. Unos kuantos dias antes de salir al viaje se ambezo la muerte del amigo entimo djudyo, ke era un kompozitor presyozo de la muzika senfonika del syeklo 20. Esta muerte lo influenso muncho i desido de eskrivir un kuento largo, ke el sujeto sera;
La Pasyon ke se syente a la ermozura absoluta (mutlak güzellik) i la sivdad de Venedik. Esta ovra sera una ovra emportante de la istorya de la literatura.
Veramente fue una konferensya muy enteresante, ke todos los partisipantes persiguaron (takip etmek) sin tomar reflo.
Despues de midi; asistimos al ladino kon, ‘Anna Eskenazi, Karen Şarhon i Suzet Herman’ ke mos avlaron sovre el sujeto: “Lo de ayer i lo de oy!oy!oy!”.
Mos izyeron riyir kon sus sempatiyas i lo ke mos kontaron en komparando la vida de antes 50 anyos kon lo de oy.
Kontinuimos kon ‘Ahmet Ünal Çeviköz’ el ambasador retratado ke avlo sovre:
“Ke deve de ser la Politika de la Turkiya en el anyo 2015 en frente de todos los paises del mundo.”
A la fin del dia, dos mansevos ke arivaron de İsrael, kantaron en ladino i en ebreo i allegraron a todos, kon sus bozes maraviyozas, i movimyentos sempatikos.
La kantika de alkavo fue Los Bilbilikos; ke estuvo akompanyada por ‘Avi Alkaş’ ke kanto kon su boz de seda i majestuoza (muhteşem).
Fue un dia yeno de savedurya (bilgi), byen organizado, kon muncha djente i muy reushido.
Kero felisitar a todos los ke lavoraron de alma i korason, kon grande veluntad para esta grande organizasyon. Fueron kapaches i muy mitikulozos (özenli) para elijir (seçmek); los profesores i los personajes etranjeros envitados, para resivirlos i okuparsen 3-4 dias kon eyos fina sus partensyas.
