Vengo de resivir el mensual djudyo en lingua franseza “Information Juive” syempre muy interesante grasyas a sus editoryalistos i kronikores de grande valor i tambyen a sus entrevistas kon espesyalistos de varyos sujetos de aktualidad.
Este mes, topamos dos intevius echas kon dos byen konosidos analistos del ‘djihadizmo’, thema ke aktualmente okupa dolorozamente el esprito de kualkyer persona. El primer es un komentador djudyo ‘Frederic Encel*; el segundo, una eskritora Muzulmana ‘Dounia Bouzar’.
Todas las dos entrevistas muy interesantes, kon repuestas imprenyadas del mizmo esprito analitiko de la situasyon aktual i tambyen de un humanizmo propyo a lo ke nombramos “sivilizasyon”.
En mi dezeo de komunikar parsyalmente a mis lektores una partida de lo ke kontyenen estas dos intervius, pensi darvos en el prezente artikolo (en konformidad kon el orden de publikasyon en la revista “İnformation Juive”) el rezumen de las kestyones i repuestas del enkontro kon Frederic Encel i azer lo mezmo la semana ke vyene, por la entrevista kon ‘Dounia Bouzar’:
Segun vuestra opinyon, kualo es lo ke karakteriza el Djihadizmo aktual?
Frederic Encel: ‘El djihadizmo aktual terrivlemente fanatiko’ no se inspira unikamente de los komentadores radikales tal ‘İbn Taymiya’ o ‘İbn Abdelwahab’ ma de un djenero de nihilizmo (refuzado de parte de los Muzulmanos konservadores) ke es komo una desviasyon total de la Letra komo del Esprito del Koran, i esto al profito de una meskla de konseptos ke son en mizmo tyempo revolusyonaryos i eksterminadores, tal ke fue el kavzo,ay de esto unas kuantas semanas, por sus komporto kaji jenosidaryo kon los Kristyanos i el puevlo Yezid de Irak.
Komo eksplikar el enfoho de una kuantidad bastante grande de jovenes ke kayen en la absoluta radikalizasyon del djihadizmo?
Fr. Encel: Desgrasyadamente, el radikalizmo del djihadizmo aktual es renovador i ansi fasina la manseves, el es un djenero de brigada internasyonal avyerta mizmo a numerozos konversos i su primer objetivo es de abatir el progreso oksidental.
Es ke se puede pensar ke la komunidad djudia de Fransya es la primera a ser apuntada komo viktima?
Fr. Encel: Si no la primera, en todo kavzo ‘una de las primeras’.
Un komentador, eksperto en esta kestyon, dize ke los kandidatos al djihadizmo profitan de las faltas de muestra sosyeta para (paradoksalmente) prevalersen kontra mozotros del kontenido de la “Deklarasyon de los derechos del ombre” i de todos muestros grandes prinsipyos.
Fr. Encel: Esto es sistematikamente el kavzo por todos los terroristos ke keren destruir el sistema demokratiko i republikano. Es por esta razon ke frente a frente kon los ke amenazan la demokrasia, los demokratos deven defendersen de una manera implakavle, kon argumentos absolutamente legales i una egzijensya absoluta de moralidad.
El eskrivano ’Abdellah Teia’ pensa ke una profunda otokritika deve ser echa en varyos sektores sosyales muzulmanos en profitando del ’sistema de komunikasyon Internet’, lo ke sera un verdadero kombate kontra el djihasizmo kriminal. Eske esto korresponde a tu opinyon?
Fr. Encel: Absolutamente si. Konsernando la otokritika, numerozos eruditos Muzulmanos ya la azen kon grande tenasidad desde un largo tyempo, partikularmente en el 19en siglo durante el kual munchos reformadores fueron muy pasifikadores. Oy tambyen munchos de los savyos aktuales se esforsan de azersen oir i de inkulkar al puevlo sentimyentos de humanizmo i de djustisya.
En frente de la ideolojia asasina del djihadizmo aktual, no se puede akseptar kualkyer induljensya ni tambyen kualkyer amalgamo.
* Frederic Encel: Doktor en Jeopolitika habilidado a dirijir investigasyones H.D.R.--- Profesor de relasyones İnternasyonales en el E.S.G. --- ‘Maitre de Conference’ en “Science Po” (Paris). -- Direktor de seminaryo en el İnstituto Franses de Geopolitika.
* Frederic Encel: Doktor en Jeopolitika habilidado a dirijir investigasyones H.D.R.--- Profesor de relasyones İnternasyonales en el E.S.G. --- ‘Maitre de Conference’ en “Science Po” (Paris). -- Direktor de seminaryo en el İnstituto Franses de Geopolitika.
