El peligro del djihadizmo individual

Klara PERAHYA Judeo-Espanyol
30 Ekim 2014 Perşembe

Estos ultimos dias una multitud de aktos kriminales (munchas vezes inkomprensivles a primera vista) fueron perpetrados  en varyos lugares del mundo oksidental, sin ningun sinyo de kontakto kon kualkyer grande sentro djihadisto, por individuos al pareser perfektamente asimilados a la kultura ansi ke a los uzos i kostumbres del payis ande se topan.

Semblavle a las grandes nebulozas  “Alkaida”, “İşil”, “Boko Haram” ets... este djihadizmo individual se esta manifestando kon una frekuensa de dia en dia mas grande i  esta tomando una ekstansyon ideolojika ke puja kontinualmente en intensidad en “los Estados Unidos”, “el Kanada”, “ la  Australia” i espesyalmente la Fransya, Ingleterya  i Beljika.

Es verdad ke desde un largo tyempo ya savemos ke en estos grandes payizes oksidentales, egziten malorozamente selulas sekretas atadas al mizmo koryente relijyozo i ideolojiko, laskualas kedan por un syerto tyempo inaktivas debasho una aparensya de absoluta adaptasyon a  la manera de bivir i pensar lokal, ma ke subitamente (a la sigida de un orden del sentro) entran en aksyon, tal ke provablemente fue el kavzo de la trajedia del World Trade Center.

Aktualmente aparese un muevo djenero de koryente ideolojiko, kon jeneralmente los mizmos objetivos, ma sin ser  atado a kualkyer sentro ni resivir kualkyer preskripsyon konsernando el momento o la manera de entrar en aksyon, un  djenero de djihadizmo independyente i  individual al kual adheran kontinualmente muevos konversos al islamizmo, lo ke se produze en este momento en la Evropa ande munchos de entre eyos parten en Siriya de sus propya inisyativa para voluntaryamente kombatir en djuntos kon las armadas kriminales del İŞİD.

Segun lo ke meldi la semana pasada en la revista franseza byen konosida “Le Point”, desde el tyempo de la fundasyon del movimyento Al Kaida, Ben Laden ya avia yamado (kon varyos artikolos i videos sovre Internet) sus propyos myembros i tambyen partikularmente sus voluntaryos, a pasar a la aksyon personalmente  sin aspera kualkyer orden prechizo.

De mezmo, en el anyo 2010 el konverso amerikano Adam Gadahn , nombrado aktualmente  “Azzam el Amerikano” avia evokado en una revista  en lingua ingleza publikada en el Yemen, los doveres del Djihad individual. El avia dicho lo sigyente: “los Muzulmanos ke se topan en el oksidente deven saver ke son perfektamente en  pozisyon de djugar un rolo desizivo en el djihad kontra los sionistos i los kruzados, ansi, ke asperash?” 

El djihad individual es muy peligrozo, porke syendo una entidad heteroklita, el es difisilmente persivido i detektado a tyempo, i tambyen porke la mas parte del  tyempo el es portador de muevas aspirasyones morbides deskonosidas asta muestro tyempo.

Aktualmente la atmosfera parese ser kargada de aktos  ke van mas leshos ke muestro entendimyento, komo si en el ayre ke respiramos, ay un djenero de nihilizmo abrupto ke no se limita a la simple  negasyon de varyas valores espirituales,  ma va asta kerer perpetrar el akto absoluto de sus kompleta destruksyon.

Simple hipoteza byen entendido,  una kestyon mos vyene al esprito: “Eske la sivilizasyon oksidental  esta parsyalmente en peligro de arresvalarse poko a poko en direksyon de un estado de konfuzyon kahotika difisil a evitar? İ, si tal es el kavzo, kuala es “la parte de responsavilidad” de la prisa(acele) kon la kuala fue realizada la mundyalizasyon?”