Ya pasimos las fyestas; Rosh-Ashana, Kipur i Sukot kon grande antuzyasmo.
Esperamos ke la mueva anyada sera para mozotros, todos los djudyos del mundo; una anyada yena de esperansa, sanedad, trankilitad i pas.
Este anyo komo la sinagoga de Burgaz estuvo serrada, fyestimos kon mi marido i mi famiya, las fyestas en Neve-Shalom.
Neve-Shalom; es la sinagoga prensipala i la mas famoza de los djudyos de Turkiya.
Se avyo en el anyo 1951, es la sinagoga la mas mueva i la mas grande de Estambol.
Todas las bodas ke se realizan aki, tyenen una ermozura espesyal.
Una keila es alegre kon la djente ke asiste a las orasyones, a las fyestas i a todo modo de evenemento.
Sukot es una fyesta grandioza. Malorosamente no aviya bastante djente en Sukot en la keila de Neve-Shalom. Mizmo ke no aviya kriyaturas, las orasyones de los hazanes, kon sus bozes maraviyozas mos izo tremblar los sentimyentos.
Despues de este mez sakro yeno de fyestas, una de detras de otra, va mos a tener un invyerno yelado, kon tyempos ariskuros.
Esta sezon mos da la posibilitad del desvelopamyento personal, seyga en iyindo a los teatros, filmos, ekspozisyones, seyga en iyindo a los konsertos, a diferentes kursos de lingua u de pintura para pasar el tyempo en yeno.
Alhad oy, tuvimos la okazyon de asistir kon mi marido; a una Bar-Mitsva organizada de una manera perfekta en todo modo punto de vista en la sinagoga Neve-Shalom.
La bar-mitsva era de “Seymur SAUL” ijo de “Virna i Rıfat Saul”, inyeto de “Esti Viktor Saul” kon “Fortüne Beno Mizrahi”.
A la entrada al kal, unas takkes amariyas en forma de top de tenis, para los ombres, ke estava muy alegre al ver, veramente me se achileyo el korason.
“Virna”, la madre; vistida muy simple, kon su fostan i el chapeyo paresiya a una prensesa novle yena de emosyon.
Las granmamas, no se kere dicho, la alegriya de ver al inyeto en la Teva meldando la orasyon sin azer dingun yerro. El padre “Rıfat” kon los granpapas allado de “Seymur”; un tablo maraviyozo de verlo kon los tres padres.
Despues la orasyon, komo era “Sukot”, los hazanes “Aşer Levi” kon “Natan Siliki” kon sus bozes maraviyozas, tenyendo en sus manos los simboles de Sukot; ke son: arava, lulav, etrog i adas; ampesaron a tornarsen en el doredor del kal.
Lo mas sinyifikativo de esta bar-mitsva fue; ke el “Rav Nafi Haleva”; mos dyo a entender el senso de los kuatro semboles de la fyesta, ke el “Dyo” esta en todas las partes, en el universo (evren) entero.
Mozotros en dando bueltas a la syedra, a la derecha, al norte i al sud (güney); estamos akseptando ke no puedemos ayegar, alkansar al Dyo Baruhu, ke egziste en el mundo entero.
“Rav Nafi Haleva”, despues de darmos el senso de esta fyesta muy grande; lo tomo a “Seymur” delantre del mikrofon en la Teva, i mos konto una konseja muy sinyifikativa sovre los djudyos.
Vos kero dar un rezumen (özet) de lo ke konto keridos lektores, para alkansar la illuminasyon (feyz almak), i kitar una leson de esta konversasyon.
“Lulav, Etrog, Arava i Adas sembolizan kuatro djudyos diferentes.
El uno tyene relasyones fuertes kon todos, ma no se enteresa de la Tora.
El otro, se enteresa de la Tora, ma no tyene relasyones kon la djente.
El treser es muy kumplido (münevver, kültürlü), se enteresa de la Tora i es muy sosyal.
El kuatren; no se enteresa de la Tora, i no tyene relasyones kon dingunos.
Todos son djudyos ma diferentes.
Estos todos kalen ke se aunen kon kerensya, kon fidelitad i kon tolerensya, para ke los djudyos tengan miraklos en sus egzistensyas en la istorya komo syempre. En esta vida ay dos kozas emportantes:
• Ser pozitivos, mirar a la vida pozitivamente, i
• Dar loores a lo ke tenemos, en akseptando ke; lo ke va arivar de negro en muestra vida sera para el byen muestro.
Kerer byen al den frente, porke todo lo ke tenemos es pasajero (geçici) en el mundo.”
“Seymur”; tu bar-mitsva fue muy diferente, i inolvidavle para mi, una fyesta spesyal kon todos los detalyos pensados perfektamente.
Te oguro, sanedad, reushitad, felisitad i repozo bueno en tu vida. Ke tus paryentes syempre se glorifiken de ti, de tus reushitades.
