La publikasyon postuma de los tekstos pretos de Martin Heidegger

Klara PERAHYA Judeo-Espanyol
15 Ekim 2014 Çarşamba

Konformamente al testamento del autor, en unas kuantas semanas seran publikados i ansi rendidos  aksesivles a todos: ‘Les cahiers noirs’ (Los tekstos pretos) de Martin Heidegger, uno de los mas grandes filozofos del venten siglo, ma  fervyente adepto de las theorias Nasyon- sosyalistas i de los konseptos hitleryanos ke el nunka renyego avyertamente, mizmo despues la segunda gerra mundyal i la Shoah.

Ke van a ser las varyas reaksyones a esta publikasyon en este momento de kompleta konfusyon mundyal?

Komo todos ya lo konyoramos ‘el mundo aktual en su dimensyon kaji total’ devino una meskla kahotika de elementos kontraryos, amalgamo echo simultaneamente de ‘luz  i tinyevlas’, ‘adelantamyento i regresyon’, ‘amor i odyo’,ets...Ansi, fatalmente kestyones muevas nasen en muestro esprito, preguntas  ke por seguro kedaran syempre sin repuesta, eternalmente en sospenso en un espasyo ande aktualmente todo parese aver ayegado a un punto de salvajeria ineksplikavle.

No se si la edad aumenta o enchikese muestro poder de djuzgamyento; en todo kavzo a la sigida de los eventos ke aktualmente se produzen dia despues de dia en muestro entorno, kada uno se topa (a la dimensyon de sus propyas refleksyones) en un estado de perpetual dubyo, al kual para mozotros djudyos se adjunta una inevitavle  fokalizasyon sovre muestro destino ke se revela de ora en ora mas problematiko.

Si...Para mozotros ijos i ijas de Moshe Rabenu, en este mundo obskuro ande paradoksalmente el mal i el byen paresen ser enganchados el un al otro,  una kestyon suplementarya mos obseda :-“kualo sera el futuro de este chiko punyado de ombres i mujeres al kual apartenemos, dispersados en las kuatro partes del universo sin ke seyamos nunka pedridos los unos a los otros en la inmensidad de una humanidad de kaji dos milyardas de personas por la mas parte antisemitas, mizmo sin munchas vezes  aver visto una kara de djudyo?

Nunka puedramos entender la razon de este menospresyo ke mos persige, ainda mas kuando es de la parte de personas  konsideradas komo syendo muy byen pensantes.

Fue ansi de Martin Heidegger, ke era konsiderado komo un giador intelektual de parte de munchos filozofos, tal: Jean Paul Sartre, Emmanuel Levinas, Jacques Derrida, Anna Arendt, Michel Foucault, ets… loskualos se apresuraron de introduzir munchas de sus teorias en Fransya, pensadores entre los kualos solo unos kuantos lo renyegaron mas tadre kuando se rendyeron kuento de su indjusta inimistad kontre sus dishiplos djudyos.

 Heidegger fue el filozofo el mas alavado del venten siglo, ma tambyen el mas kontestado, partikularmente a la sigida de su atitud durante el periodo 1933-1934, epoka durante la kuala el era rektor de la Universidad de Friburg, lo ke  avia koinsidado kon su adezyon al partido nazi, del kual el se alesho poko despues sin por esto nunka renyegar o dezaprovar a boz alta los konseptos Hitleryanos.

El antisemitizmo del grande filozofo era vizivle en sus aktos i palavras komo tambyen en su korrepondensya personal i sus korsos universitaryos. En una letra eskrita a su kolega Kurt Bauch, myembro igualmente del partido Nasyonal Sosyalisto, el se kesho avyertamente de la prezensya de elevos djudyos  en sus korsos... El tyene mizmo deklarado en un seminaryo de edukasyon politika,  ke ‘la natura del espasyo alman’ no se manifestara provablemente nunka a los nomades semitikos sin tyerra (lo ke eran los djudyos de entonses).

Su sentimyento por el djudaizmo era muy komplekso i mizmo a syertos momentos ambivalente. Segun munchos de sus analistos, en el periodo ke presedo la segunda gerra mundyal, el fue uno de los primeros a introduzir en sus korsos  los maldichos prinsipyos de Hitler, ma de otra parte (por razones obskuras) el demisyono de sus funksyones administrativas de karakter nazi.

De mezmo, segun lo ke dizen Karl Löwth i Hugo Ottavla: “Aun ke Heidegger no eskondia nunka su konfiansa en el Führer, i ke mizmo livros djudyos fueron kemados en la Universidad de Friburg debasho su rektorato”, el por kontra avia prohibido las afishes antisemites de los estudyantes nazis ansi ke las manifestasyones kontra un profesor djudyo.”

Si... tal ke ya fue formulado mas arriva “Ke sera la atitud de estos eternales enemigos del djudaizmo, despues la publikasyon de los dichos tekstos pretos?