En Munih, la ekspozision sovre la vida de los judyos de oy en la Evropa

Dora NİYEGO Judeo-Espanyol
1 Ekim 2014 Çarşamba

Un grupo de estudientes de la Ludwig-Maximilians Universidad en Munih, estan aparejando un projekto sovre ‘la vida judiya de oy en la Evropa’. Este projekto se esta aparejando kon la kolaborasion del Muzeo Judiyo de Munih. El grupo de estudientos se divizo en unos kuantos grupos, i kada grupo esta aziendo investigasiones (araştırma), en una sivdad de la Evropa, sovre el sujeto ke eskojeron. Los rezultados de este projekto se vana prezantar en una ekspozision en el Muzeo Judiyo de Munih, ke va tomar lugar en el Oktober del anyo 2015.

Patricia Konrad i Vera Ziegler, dos estudientes de este grupo, se desidaron de tomar komo sujeto ‘la lingua judeo-espanyol’. En los diyas ke pasimos, Patricia i Vera vinieron a Estambol para azer sus investigasiones. Unos kuantas kestiones ke mos demandaron son: ‘Komo biven los judyos en Estambol? Ken son los ke avlan judeo-espanyol? Kuando i en ke situasiones se esta avlando esta lingua? Ke sinyifika ‘la lingua del puevlo’? Ke pensan los sefaradis de Estambol sovre el futuro de esta lingua? Komo de stratejias estan aprovando los sefardis para konservar esta lingua?’

Para topar repuestas a estas kestiones, las dos estudientes vijitaron el Muzeo Judiyo de Estambol, el Schneidertempel, el Simeterio Sefaradi en Ulus, la Sinagoga Neve Shalom, i el Simeterio Nakkaştepe en Kusguncuk. Avlaron tambien kon Robert Schild sovre la komunidad judiya de Estambol. Karen Gerşon Şarhon i Güler Orgun (del Sentro de İnvesatigasiones sovre la Kultura Sefaradi Otomana-Turka) les dieron enformasion sovre la kultura i la tradision sefaradi, tambien sovre el periodiko El Amaneser. Las dos estudientes kijeron tambien avlar kon las eskriventes de la oja Judeo-Espanyol de la gazeta Shalom, i realizaron tambien entrevistas kon Klara Perahya i kon mi. Keriyan tambien avlar kon Şeli Gaon, Coya Delevi, i Esti Saul, ma no tuvieron sufizante tiempo.

‘El objektivo de muestro projekto es de enformar los vijitantes de la ekspozision sovre la lingua judeo-espanyol’ disheron Patricia i Vera. ‘Arekojimos diksionarios, CD’s de muzika, livros de komidas, i livros de proverbos i dichas. Algunos avlantes de judeo-espanyo vana estar prezente akel diya en la ekspozision. Ansi, los vijitantes vana pueder partisipar al ‘laboratorio de linguas’.

Las sivdades i los sujetos de los otros grupos ke se estan aperejando por este projekto son:

Londra en los Estados Unidos: Tradision de komidas kasher, i resevtas de las komidas.

Umea en Suesia: Festival de las minoridades.

Reykjavik en İslanda: Una komunidad kresiendo sin struktura enstitusional komo Sinagoga o Rabino.

Marbella/Kadiz en Espanya: Aziendo kasher vakansas.

Varshova en Polonya: Festival de kantaderas de la Kultura Sefaradi.

Budapeshte en Hungaria: dainda no se desidaron sovre un sujeto.

Patricia Konrad i Vera Ziegler vana kontinuar a enformarmos sovre las futuras investigasiones de este projekto.