La fuersa de Palavras de esperansa

Klara PERAHYA Judeo-Espanyol
24 Eylül 2014 Çarşamba

Mizmo si esto puede pareser oy utopiko i irrealizavle en un Universo de mas a mas ferido en su dinyidad i su humanizmo, en esta semana de fyesta kero antes de todo empesar este primer artikolo del muevo anyo  kon palavras de esperansa, sentimyentos de amistad i sovre todo dezeo de ver el mundo ayegar a una mijor relasyon de las personas entre eyas.

Ay palavras ke munchas vezes fyeren i destruyen mas ke kuchiadas ensangreteadas, komo tambyen ay palavras ke konsolan i melizinan… Mos esforsaremos de eskojer las segundas

En un diskorso echo sovre el terrivle aumento del antisemitizmo, ke el pronunsyo delantre mas de 1000 reprezentantes de komunidades djudias de varyas sivdades de Fransya, el Primer Ministro  Manuel Walls formulo una fraze ke, lo espero, sera eskrita syempre kon letras luminozas en la historya del payis de Montaigne: “Sans les juifs, la France ne serait pas la France” (Sin los djudyos, la Fransya no seria la Fransya).

Semejantes deklarasyones pronunsyadas de parte de un Prezidente de Governo, no son faktos koryentes en este momento; eyas konstituen la mijor arma para eradikar parsyalmente  este maldicho odyo ke (en varyos lugares) persige i kere mutilar el djudaizmo.

Konsyente i inkyeto de la rekrudesensya de manifestasyones kontra la manseves djudia ke yeva una kipa en ka kavesa, Manuel Walls lucho kontra eyas durante su ‘Ministeryo de las Kestyones Interyores’  i agora tambyen ke es el shefe del Governo Fransez, el kontinua el kombate kontra un retorno del vyejo sentimyento anti-djudaiko ke parese despertarse en diferentes fraksyones del puevlo.

El se revolta kon boz alta kontre kualkyer palavra antisemita  afin ke ‘una indiferensya a este sujeto’ no se instale en la opinyon popular franseza i nunka renunsya a denunsyar kualkyer desviasyon en este senso, malgrado ke munchas vezes el se syente solo en semejantes kombates.

Se puede de mezmo prezumir ke Manuel Walls es konsyente ke debasho el termino ‘antisionizmo’ repoza un antidjudaizmo permanente ke (en el pasado) se manifesto de una manera muy brutal en una ancha fraksyon del partido ultra nasyonalisto franses enganchado a valores medyevales.

La afirmasyon ke  -‘sin los djudyos, la Fransya no seria la Fransya’- (Sans les juifs la France ne serait pas la France) mos prova la konviksyon del primer Ministro franses ke desde los siglos pasados, uvo i ay una grande partisipasyon de los djudyos en los esforsos de enfloresimyento intelektual komo tambyen industrial del payis.

Ainda unos kuantos mezes antes, uvo personas byen o mal intensyonadas ke manifestaron (kada una a su manera) una  syerta sorpreza delantre la frekuente atribusyon del Premyo Nobel a syentifikos djudyos.

Sera vano i ridikulo de pretender kel puevlo djudyo poseda un koefisyente intelektual jenetikamente superyor a otros, ma por kontra se puede pensar ke ‘su largo egzilyo en payizes ajenos’ desvelopo en el una fuerte fakultad de adaptasyon a muevos ambientes, paralelmente a un kudyo kontinual de oto defensa.

Asta la kreasyon del Estado Israelyano, el puevlo djudyo sin tyerra propya durante mas de 2000 anyos,  bivyo perpetualmente en estado de alerta i de espanto de un perikolo ke puedia apareser de un momente al otro, lo ke lo metyo kontinualmente en el ovligo de pensar profundamente antes de echar un paso, o de pronunsyar un byervo.

No mos olvidaremos tambyen todos los esforsos de persepsyon i de entendimyento ke los estudyos talmudikos desveloparon  en kada uno de muestros avuelos, los kualos inevitavlemente los transmetyeron a sus desendyentes. 

De mezmo, despartidos en los kuatro kantones del mundo, uvo syempre en kaji kada  djudyo la obsesyon de su responsabilidad en direksyon del otro… Ansi se puede atribuir a muestro puevlo esta fraze selebre de Dostoievski: “Kada uno es responsavle ‘de todo’ delantre todos, i yo mas ke los otros.”