Borusan İstanbul Filarmoni Orkestrası en Albert Hall, Londra

Fue un plazer de enkontrar Sadi Baruh ke partisipo a la turné. No peryi la okazion de oyir sus sentimientos para komunikarvolos

Esti SAUL Judeo-Espanyol
3 Eylül 2014 Çarşamba

Miembro del Grupo de Kornistos, SADİ BARUH, mos konta la nochada de 29 Julio 2014:

“Komo savesh, la famoza orkestra kontinua a ser la lokomotiva del arte de MUZIKA KLASIKA de ESTAMBOL.

El 29 de Julio, el konserto en el Albert Hall (Londra) de mas de 2 oras, tuvo grande “eko”, sea en Ingletierra, sea en Turkiya.i, puede ser, en el mundo.

Yo, Sadi Baruh, partisipi a la turné del konserto komo miembro del grupo de kornistos.

Kuando entri en la sala de konserto ALBERT HALL de reputasion mundial, me sinti echizado de oyir la akustika de mi boz. Despues de la prova de las 11.00 a las 14.00 oras, tuve el plazer de vijitar los salones kon mi kamera. En.las fotos ke travi se pueden ver la galeria i sus balkones. La ermozura de la akustika del salon en las Alturas, solo se remarka en estando presente.

EL PROGRAM:

PROKOFIEV, 1914 Konserto de Violin,

MOZART, Die Entführung aus dem Serail (Abduksion del Serayo), UVERTUR, ETS.

Las palmas del salon mos maraviyo realmente, imposivle de eksprimar muestra emosion.

Despues de “BALAKIREV ISLAMEY”, no se arretaron las palmas, todos en pies.

Sovretodo, la ovra de ULVİ CEMAL ERKİN. Köçekçe, kon muestro famozo Maestro, SASHA GÖTZEL, ke mos onoro i alevanto los grupos de la orkestra entera, sin olvidarse de mozos, los kornistos...

Lo ke bivimos en Londra es una “Premiere”. Tornimos en Turkiya orozos, kontentes.

Suetamos ke todas muestras institusiones de muzika bivan.”