Despues de una gerra no es solo lo ke keda en la mano de palpavle ke importa, ma prinsipalmente el potensyal de andelantamyento pozitivo de la situasyon, i ansi de la rezolusyon del problema ke provoko el litijyo.
Ay de esto 3 o 4 dias, Binyamin Netanyahu deklaro en la radyo Israelyana.“Luchimos 50 dias i puedriamos luchar otros 500 dias, ma mos topamos en una situasyon ande tenemos el ‘Estado Islamiko’ a la puerta de la Jordania, Al-Kaida en el Golan i el Hesbolah a la frontyera kon el Lebano...Desidimos de no undir muestras fuersas en Gaza...i de limitarmos a muestro objetivo ke es de asegurar el kalmo a los sitizanos de Israel.”
Varyos dirijentes komo tambyen simples sitizanos de Israel kritikaron el Primer Ministro de aver akseptado el “sesar el fuego” al lugar de kontinuar la lucha asta eskapar enteramente del Hamas.
Es ke tuvyeron razon? Por seguro ke las opinyones de la totalidad de un mizmo puevlo son multiples i inevitavlemente munchas vezes kontraryas las unas a las otras.
Es ke a la kontra de lo ke pensan los kontestataryos ,’esta desizyon de una situasyon de no-belijeransya’ no es mas propisya a una mijor komprensyon entre los dos adversaryos? i ansi a un esforso komun para ayegar a una desizyon ke no metra el uno de entre eyos en estado de vizivle superyoridad i el otro de kompleta inferyoridad?
Ay por seguro muchos esforsos a azer de las dos partes, i en las limites ande esto es posivle, muchas kozas a las kualas renunsyar komo tambyen munchos privilejyos a akordar sin ira o ravya ni esprito de revencha...
En el aktual konteksto sosyal realmente kahotiko del Oriente i partikularmente del Oriente Medyo, no se puede ni pensar ni avlar de ‘voluntad de eradikasyon del uno de los dos protagonistos de parte del otro’ ma simplemente de ‘una akseptasyon el uno del otro’ kon muy grande prudensya i prekosyon, todo en syendo sin verdadera rankor ke puedra ser paridera de muevos konfliktos.
Es verdad ke munchas de las revendikasyones del Hamas son difisilmente akseptavles en el inmedyato, ma puede ser ke (kon el tyempo i una real buena voluntad de las dos partes komo tambyen de provas de sinseridad resiprokas) la konfiansa empesara a reestableserse....
Las reklamasyones en kestyon son las sigyentes:
La abolisyon kompleta del blokus.
La avyertura del porto maritimo i del aeroporto en Gaza.
La avyertura tambyen del posto frontalyero de Rafah kon el Ayifto.
La libertad de movimyento para los moradores de Gaza a la fontyera kon Israel.
La supresyon de la zona tompon ke es prohibida a la populasyon de Gaza.
La otorizasyon de peshkar asta dodje miles marinos.
La liberasyon de los prizyonaryos ke ya avian sido afrankados i ke fueron de muevo enkarselados a la sigida de la kaptura de los tres adolesentes djudyos.
A este sujeto, el Primer ministro İsraelyano deklaro ke negosyasyones seran organizadas en aproksimativamente un mez entre İsraelyanos i Palestinyanos sovre los puntos los mas sensivles tal la avyertura del aeroporto de Gaza, la demilitarizasyon del lugar i la liberasyon de los prizyoneros.
El disho “No vemos ningun problema en el fakto ke la Autoridad Palestinyana tome el kontrol de Gaza, ma vemos un problema si el Hamas toma el kontrol de la Sisjordania… İsrael ne puede azer la paz kon un interlokutor ke dezea su destruksyon”
El Dyo ke meta su mano i pushe los pasos de İsrael i de su adversaryo en direksyon de una paz ke renforsara sus seguridad ansi ke la de sus entorno. Amen!
