En omenaje a una amiga

Coya DELEVİ Judeo-Espanyol
13 Ağustos 2014 Çarşamba

Aze munchos anyos ke konosi Beki Bardavid. Konosi tambien, desde mi chikes, su madre, la poetesa Lina Albukrek (de b.m) ke tengo su fizyonomiya delantre los ojos. Eran amigas kon mi mama.

Kon Beki mos konosimos (se puede dizir ofisyalmente) en el anyo 1973, en un matrimonio: mi prima ermana kazando kon su primo ermano…Presipyos de 2.000 empeso muestra intimidad, muestra reel amistad. Era la epoka ke estava eskrivyendo yo mis rekuerdos de chikes, ande nombrava Tekirdağ i, espesyalmente Chorlu. Syendo ke Beki tambien teniya raizes ayi, mos enkontrimos muy frekuente o mos korrespondimos.

Beki estava preparando su Tezis de Doktorat i me demandava en vezes detalyos. En desparte, moravamos muy serka, en la mizma kaleja. En kurto, tuvimos munchas okazyones de enkontrarmos seya para lavorar o seya para simplemente avlar.

Beki era tan shakadjiya ke syempre topava una koza para azer reir. No me olvido, la resepsyon en el “Instituto Cevantes”… Era a la okazyon de la publikasyon del livro “Trezoro Sefaradi”, en kolavorasyon kon muestra amiga Fani Ender. Beki aviya dicho: “Para este lavoro, arrekoji seko i vedre, todo lo ke topi!!”.

Era tambien muy enerjika. En un teksto miyo sovre la konsepsyon de ser aedados, eskrivi por la reushita de Beki. Su tezis de doktorat aviya sido achetado i entonses era Dr. Beki Bardavid. Esto no fue sorpreza para mi. Ma syertos se enkantaron al grado de demandar, a su edad, komo Beki topo la enerjiya i veluntad de estudyar… Kon grande amabilidad me arregalo el “print” de su importante lavoro.

Beki, en vezes eskriviya en la Revista Los Muestros de Beljika. Aki, kon sus propios byervos, pasajes de “El Judezmo Muestro en Londra” Los Muestros No 37:

Hilary Pomeroy kon su fuerte organizasyon, komo kada anyo, ayego a organizar el 27, 28 i 29 june, en Queen Mary University i Westfield College, en el departamento de las Buskidas de la Lingua Judeo-Espanyol, el 11en Kongreso de las Buskidas del J-E. İ yo estuve yamada komo konferansiera”.

“En el aver estavan bolando palavras konsernando los Judios del Imperio Ottoman i de la Turkiya… Tres diyas, de la 9 de la manyana asta las 9 de la noche, kaji trenta personas avlaron, empesando de elevos asta profesores famozos del mundo entero, avlaron en ingles, en espanyol, en Judezmo i prezentaron los lavoros ke prepararon. Respektaron la limit del tyempo ke apunto el komite”.

“ …siantifistos, akademisyenes, linguistikos de las universitades famozas del mundo ekspozaron kon grande entusiasmo, sus bushkidas konsernando la lingua ke avlan los Judios, emprimero en el Imperio Ottoman i despues en la Turkiya moderna. Yo trati de un suje irrezistivle, un suje ke esto investigando de dies anyos para aki i ke sera mi suje de mi tezis de doktora:La Vida de los Judios de Turkiya del 1850 al 1950”...

Beki Bardavid era una persona espirituala, sempatika, sangruda. Esto lo konstati munchas vezes. El lektor lo puede remarkar tambien en el paragrafo sigiente:

“Me limitaron el tyempo siguramente komo a todos i yo todo en sudando, kon una pena profonda i kon el kudyo de no mankar a las reglas de la etik, konti los 100 anyos de los Judios de Turkiya en 10 puntos, kijo dezir ke me kayo un punto para kada 10 anyos!...”…

“Ken avlo? En la inogurasyon, de la “Katedra del Judeo-Espanyol”por el Prof. Haim Vidal Sephiha, ke plaso esta lingua deperdida, ariento de muestros korasones, el Prof. Sephiha de Sorbonne Nouvelle, mos avlo de una konfuzyon grafika konsernando el yeismo. Prof. Tamar Alexander i Dr. Avner Perez de la Universidad Ben-Gurion, Dr.John Zemke de la Universidad Missouri de Columbia, Dr Schmuel Rafael de la Universidad Bar-İlan, Matilde Gini de Barnatan de Madrid, Prof. Winfried Busse de la Universidad de Frei Berlin….Estos son unos kuantos de los profesores del Kongreso de Queen Mary”… 

“Kon mi, Klara Perahya de Turkiya trato de la lingua avlada. El dirijador de la oja del Judeo-Espanyol del Jurnal Shalom, Salomon Bicerano, avlo de la lingua poetika i mos meldo unos, kuantos de sus poemas. I yo, ekspozi mi bushkida sosyolojik. I mozos los tres, formimos una “Meza Redonda Turka” por la primera vez”…

“Yo, no supe ke el Judezmo estava enteresando tanto muncho a los siantifistos del mundo, kon una kuriozidad ke va pujando de la Psikolinguistik a la Istoria, de la sosioloji a la Antropoloji…. İ mas… Beki Bardavid

Mos vas a mankar muncho Kerida Beki.