Son olas enormes de odyo, kritikas i akuzasyones (por la mas parte sin djustifikasyon ni konsistensya) ke soplan en este momento no solo sovre İsrael ma tambyen sovre el puevlo djudyo en su totalidad, i ansi es el djudaizmo en su esensya la mas profunda, en su ethika, i sus preseptos los mas valutozos ke es arrastado en el lodo kon una inyovle voluntad de eradikasyon absoluta.
En la Evropa ke es konsiderada ser una de las mas grandes fuentes de la sivilizasyon moderna, en Fransya partikolarmente i en byen otros payizes, kon el ayudo inkontrolavle del ‘internet’, ‘facebook’, ‘twitter’ i otros postos elektronikos, las kalomnias azen enfloreser de mas a mas el vyejo antisemitizmo medyeval ke nunka fue enteramente vensido ma simplemente mentenido en estado de silensyo en munchos espritos kargados de prejuisyos.
Alhad pasado, aun prohibida por las Autoridades Fransezas, en una manifestation en favor del Hamas, unos kuantos partisipantes rompyeron, kemaron, brutalizaron, i destruyeron botikas de djudyos en ‘Sarcelle’ al Norte de Paris.
‘Komo syempre el Prezidente François Hollande i el Primer Ministro Manuel Walls kritikaron kon grande severidad el evento sin por esto pueder venser la kriminal inimistad anti-djudia, Robert Wistrich, otoridad mundyal en kestyones de antisemitizmo, profesor en la Universidad Hebraika de Yerushalayim, mos avla de “una situasyon muy preokupante en la Evropa i partikularmente en Fransya, Gresya, Hongria, Ukranya ets....”
Malorozamente en el payis de Montaigne i Pascal ke ofisyalmente konsidera el antisemitizmo i el negasyonizmo komo kulpas ekstremamente graves, la opinyon de una partida del puevlo es hostil al djudaizmo i sovre todo a Israel.
A este propozito, el profesor Robert Wistrich dize: “Una persona ke deklara ke İsrael aze una gerra de eksterminasyon kontra los palestinyanos es una parsona ke no tyene ninguna idea de lo ke es realmente una gerra de eksterminasyon ni de lo ke fue el Holokosto i de lo ke es el konflikto İsraelo-Palestinyano”
Es verdad ke ‘el kavzo de los kuatro ninyos palestinyanos ke djugavan al bodre de la mar en Gaza i ke fueron matados sin motivo aparente por la Marina İsraelyana’ desperto en munchos korasones los mizmos sospechos i los mizmos demonyos de una epoka ande el obskurantizmo prevalia i dominava los espritos undidos en la inyoransa…
El primer Ministro İsraelyano prometyo de azer la enkuesta nesesarya, se puede pensar ke fue un “yerro involuntaryo” o una “falta de disernimyento”, en todo kavzo 4 ninyos muryeron i devemos konfesar ke esto es muy muy triste.
Binyamin Netanyahu avia sido engloryado kuando despues el krimen ke kosto la vida a ‘Mohamad Abou Khdeir’, el ekspreso su indinyasyon i kuando la Djustisya Israelyana izo todo su posivle para arrestar lo mas presto posivle los kulpantes.
Djueves el 17 del mez koryente Israel avia akseptado immedyatamente la propozisyon echa de parte del Ayifto de “sesar el fuego” afin de pueder diskutir en una atmosfera relativamente kalma… El Hamas la refuzo kategorikamente malgrado ke le fue repetada una segunda vez.
Oy, munchas personas se demandan: ‘Deke el kabineto de seguridad Israelyano tomo la desizyon de un atako por tyerra en la banda de Gaza despues un prealavle refuzo del Primer Ministro a la mizma propozisyon formulada por Benett i partikularmente despues la deklarasyon del Ministro de la Defensa ke la Armada no kere repetar el yerro del anyo 2012?’
La djornalista Celine Lussato formulo esta mizma kestyon a Elie Barnavi uno de los presedentes embasadores Israelyanos en Fransya, el kual respondyo:
‘Kreo sinseramente kel Governo İsraelyano avia akavado enteramente ‘la formula aeryana’. Nada de lo ke fue echo no pudo dar un kualkyer rezultado para meter fin a las roketas ke partian de Gaza en direksyon de Israel...
Ansi, despues el refuzo de parte del Hamas, de las dos propozisyones del Ayifto de “sesar el fuego” afin de diskutir kon kalmo, se puede pensar ke Israel no tenia ningun otro kamino a segir.’
El D.yo Baruhu ke mos ayude, ken ke seamos, a topar el kamino de la Djustisya, de la Piadad i de la Ermandad.
