Despues de mas de un anyo de mankansa de Kapo supremo relijyozo a la kavesa de la mas grande komunidad djudia de la Evropa por kavza de la demisyon forsada del Gran Rabbino Giles Bernheim, el Konsistoryo djudyo Franses nomino enfin alhad pasado el 22 del mez koryente, Rav Haim Korsia ‘Grande Rabbino de Franya ‘posto de grande importansa, partikularmente en un payis i a un momento ande se ve de dia en dia pujar las agresyones kontra sitizanos de relijyon djudia, malgrado los esforsos vizivles de las Autoridades Governomentales ke luchan kon ardor kontra este maldicho koryente.
La eleksyon fue realizada demanyana de alhad i unas kuantas oras mas tadre, kaji todos los grandes diaryos i hebdomadaryos de Paris ya anunsyaron el fakto.
Sin grande esperansa de topar kualkyer koza komplementarya a este propozito, ize una chika bushkida i vos transmeto debasho estas linyas lo poko ke topi ma ke me parese ser de grande importansa:
‘Rav Haim Korsia aktualmente aedado de 51 anyos fue Rabbino jeneral de las armadas ansi ke de la grande Eskola Politeknika de Fransya , i tambyen el fue myembro del “Komite Konsultativo Nasyonal de Ethika”.
Rabbino de la sivdad de Reims durante 13 anyos, el lavoro al lado de Joseph Sitruk, entonses Shefe relijyozo de Fransya. En 2004 el propozo de kombidar el komedyano Dieudonné a Auschwitz afin de pueder konvenserlo de la realidad de la Shoah i luchar ansi kontra el negasyonizmo i el antisemitizmo de un grupo de mansevos desosyalizados. Ma malorozamente el Gran Rabbino Joseph Sitruk salyo kontra este proyekto.
Desde el 29 Oktobre 2006 Rav Haim Korsia partisipa a una emisyon de debate intitulado ‘Los ijos de Abraham’ al lado del relijyozo kristyano ‘Padre Alain de la Morandais’ i del antropologo ‘Malek Chabel’. Su humor ansi ke la pertinensya de sus observasyones son muy apresyadas de parte de los telespektadores.
Autor de munchos livros entre los kualos “Être Juif et Français: Jacob Kaplan, le Rabbin de la République’’ (Ser djudyo i franses: Jacob Kaplan, el Rabbino de la Republika), “La Kabbale pour débutants’’ (La kabbala para debutantes) ets… ets….
muy apresyado de varyos kreentes de kualkyer relijyon por la ‘avyertura de su esprito’, su toleransya i su humor, Rav Haim Korsia topa plazer a dialogar kon diferentes communidades i dezea muncho la pasifikasyon del konflikto Israelo/Palestinyano.
