Ke syempre tengamos a anunsyar novedades de bodas i unyon de dos korasones
La felizidad i la alegria entraron en los korasones de Teri ija de Sara & Momo Granti i Alp ijo de Selim & Tilda Levi editoryalista muy apresyada del hebdomadaryo Şalom.
Teri i Alp aunaron sus destinos Alhad el 15 del mez koryente, en la esplandor de una seremonia relijyoza ande todo era orasyones, bendisyones i kantes.
Ke D.yo bendiga esta Unyon en la prosperidad i la dulse serenidad de un entendimyento resiproko i de una kerensya mutual sin fin ni atemo.
Todas muestras felisitasyones i todos muestros dezeos de alegria i kontentes a las famiyas “Granti” i “Levi” a las kualas auguramos de syempre ser entornadas de una atmosfera echa de rizas, gozos i satisfaksyon.
Alegria en las famiyas
‘D. Habip’, ‘Basmaci’, ‘Katalan’ i ‘Güleryüz’
Un ijo nasyo en la kaza de Selin i Edi D. Habip ke fue nombrado:
Mark Nesim al kual auguramos de ser Ombre de buena Ventura, amado de D.yo i de la djente, provechozo para su famiya, su entorno i su Payis. Ke el devenga un mensajero de paz i de kerensya, simbolo de esperansa para un mundo undido en el kaos i la inimistad i ke su futuro sea syempre luminozo, aklarado por akontesimyentos alegres i tambyen voluntad personal de venser los malos obstakolos ke se puedran topar sovre su kamino.
Muestras sinseras felisitasyones i muestros auguros de serenidad i kontentes a las famiyas ‘D. Habip’, ‘Basmaci’, ‘Katalan’ i ‘Güleryüz’.
