Oganyo el 15 de Junio se selebra el Diya del Padre. En 1966, akeya epoka Prezidente de los Estados Unidos, el Sr. Johnson aviya deklarado ofisyelmente el treser Alhad de Junio, komo “Diya del Padre”.
Muy probavle, al presipyo este diya no alkanso a la popularidad del Diya de la Madre. Portanto, el entereso a esta selebrasyon estuvo pujando de anyo en anyo. Oy no me vo konsentrar unikamente sovre este sujeto, porke ya tengo eskrito muncho sovre esta fyesta. Por esta razon no kero repetarme.
Dunke desidi de aserkarme al sujeto de una perspektiva mas ancha. Pensi ke puedemos inkluir a muestro teksto de oy, los avuelos tambien. Me akodro aver echo en El Amaneser, un artikolo sovre este diya espesyal. En akel teksto avli de las tres jenerasyones: el Avuelo, su ijo i el inyeto. Ansi, un “trio” kompuesto de 2 Padres i de 2 İjos...
Dunke, vamos analizar un poko sus relasyones. En la primera perioda de chikes, ampesando del nasimiento, la kriatura depende de los paryentes. Un psikologo disho: “En la perioda de engrandesimiento del bebe, los padres estan mas muncho enteresados kon la vanda distraksyon. Les plaze djugar kon el chiko ma no les plaze tanto las angariyas komo trokarlo, alimpyarlo ets…”
Sinseramente, no es mi opinion. Portanto, devo atorgar ke ay ke pensan de esta manera. La preva es un artikolo ke meldi en una revista i, en una mezura, parese komo la konfirmasyon de las palavras del espesyalisto. Asigun lo ke me kedo en memorya, era una koza ansi: “…syertas investigasyones i enkuestas de antes kaji 40-50 anyos amostraron ke los padres pasavan kon sus kriaturas menos tiempo ke las madres. İ, tambien tomavan muy chika responsabilidad en elevendo i edukando los ijos..”
Ya es verdad, el Padre syempre traso el imaje del ke lavora, el ke trae pan a kaza. İ la Madre syempre fue la ke se okupa de la kaza i de los chikos. Lo ke era muy natural akel tyempo, porke muestras madres no lavoravan. Esto no kere dizir ke esta situasyon deteniya los padres, o syertos padres, de okuparsen de la edukasyon, de la instruksyon i otros menesteres de sus kriaturas. Ma, devo atorgar ke no era la mayoriya.
Ma aktualmente munchas kozas komo la situasyon, el modo de bivir trokaron ansi ke el standart de vida. A traverso el mundo, ansi ke i en muestro pais, estamos vyendo un shifro konsideravle de mujeres lavorando. Ken por menester, ken por diversas razones. Ya ize en el 8 Marso un ancho teksto sovre esto.
Oy muestro sujeto syendo los padres, no les azeremos indjustiya. Los estamos vyendo tomar una parte aktiva al lado de la Madre. En rezume, puedemos dizir ke el rolo tradisyonal del Padre, troko un poko. Naturelmente, no se puede enyegar ke syempre es el “pilar” de la famiya i syempre “el ke trae pan a kaza”. Lo ke ay, todo en konservando estas kualidades, el Padre se enrikesyo kon otras muevas. Me parese ke no ay menester de sitarlas. Puedemos solamente adjustar ke las relasyones pozitivas i amikal entre padres i ijos es una grande asiguransa para las dos partes.
Ansi, en akordo kon la perspektiva ke perkuri a analizar, los argumentos i ideas miyas ke ekspozi en este teksto son valivles para las tres jenerasyones. Kuala ke seya su edad, el Avuelo syempre tiene konsejos sezudos a dar kon su ancha eksperyensa de vida. Djustamente, es bazendome sovre muestras eksperyensas i mis observasyones personal, ke esto azyendo este teksto i otros.
Vinyendo a los mansevos o adolesentes…Eyos tambien, kon sus muevas konosensyas, pueden responder a todas las kestyones de los avuelos. Por egzempyo, aklararlos sovre las muevas teknolojiyas ets…No mos olvidaremos ke “Avuelo” no es syempre sinonimo de vyejo, de aedado.
Keridos amigos, ay muncho de avlar, ma chiko lugar!!. Ke dizish de kontinuar otro diya kon las “Relasyones entre los paryentes i ijos”? Mis sinseros suetos a todos los Padres...
