Apresyasyones diferentes a la sigida de una deklarasyon de Binyamin Netanyahu en la Knesset

Klara PERAHYA Judeo-Espanyol
7 Mayıs 2014 Çarşamba

Komo vos akodrarash, el 23 del mez pasado, a la sigida de la rekonsilyasyon del Fatah kon el Hamas, el Primer Ministro Netanyahu interrumpyo las negosyasyones de paz, afirmando ke Israel no puede negosyar kon un Governo Palestinyano sostenido por el Hamas, el kual es una organizasyon konsiderada de parte de los Estados Unidos i de Israel, komo syendo terrorista.

Pokos dias mas tadre, djuevez el primo del mez koryente, Binyamin Netanyahu deklaro lo sigiente: “Una de mis prinsipales misyones es de defender el estatuto del Estado de İsrael en su kualidad de ’Estado Nasyonal de muestro Puevlo’ i (giado por este objetivo) tengo la intisyon de someter una ley a la Knesset ke sera una konsolidasyon konstitusyonal de Israel komo Estado Nasyonal del Puevlo Djudyo”.

Ansi, segun lo ke la Prensa mos komunika, el primer Ministro İsraelyano aze del tema: ‘Rekonosimyento de Israel komo Estado Djudyo’ el elemento desizivo de un akordo de paz, insistyendo kel motivo de baza del konflikto entre los dos puevlos no es la okupasyon de territoryos palestinyanos desde 1967, ma el refuzo (de parte de los palestinyanos) de un semejante rekonosimyento.

Komo ya era previzivle, los palestinyanos se opozaron kategorikamente a la dicha desizyon, afirmando ke ‘akseptarla sera renunsyar sin compensasyon al derecho de retorno de los refujyados Palestinyanos’.

De su parte, el Sekretaryo de Estado Amerikano John Kerry afirmo komo syempre ke la sola alternativa es la formula de dos Estados ‘el uno djudyo, el otro Palestinyano’ ke se akseptaran i se respektaran el uno el otro. Segun el: Kon un solo Estado para los dos puevlos, el rezultado sera ‘un payis de apartheid kon sitizanos de segundo orden’ o byen ‘una solusyon ke puedra impedir İsrael de ser un Estado djudyo’ lo ke seria impensavle para el Governo Israelyano.

Tzipi Livni ke prezidyo las ultimas negosyasyones, estima kel dezeo del Primer Ministro puedra ser konsiderado komo una desizyon anti demokratika. No mos olvidaremos ke el tema prinsipal de su presedente kampanya elektoral era djustamente bazado sovre la solusyon de dos Estados vezinos, totalmente otonomos i independyentes el uno del otro.

De mezmo, el presedente Shefe del Mossad ‘Meir Dagan’ deklaro ke la egzijensya de rekonoser İsrael komo un Estado Djudyo no tyene ningun senso.

Por kontra, en repuesta a esta ultima deklarasyon de Meir Dagan, el selebre djornalisto Ari Shavir eskrive en la gazeta Ha’Aretz, ke ‘’Rekonoser Israel komo Estado Djudyo no es un akto sin senso ma una egzijensya natural i lejitima’. Primera razon: El konflikto Israelo-Palestinyano no empeso en 1967 i no konserna (unikamente) las implantasyones, el es un konflikto nasyonal, relijyozo, kultural i sosyal.

Ari Shavir eksplika ke la grande reushita del ‘Akordo de Oslo’ en 1993 fue de pushar los İsraelyanos a rekoneser ‘ke egziste en el payis un puevlo palestinyano ke tyene derechos lejitimos’ i tambyen ke el grande rezultado de la Konferensya de ‘Camp David’ en el anyo 2000 fue de mezmo el rekonosimyento de parte de Israel de la nesesidad de un Estado Palestinyano, lo ke los djudyos avian admetido.

Ansi no ay ninguna razon para ke el puevlo palestinyano no avra los ojos afin de ver i admeter a su torno, ke sovre estas tyerras se topa igualmente un otro puevlo el kual tyene tambyen su derecho a la otodeterminasyon. Los ke pensan ke ’Israelyanos i Palestinyanos’ son iguales tyenen el dover moral de reklamar de los palestinyanos egzaktamente lo ke eyos demandan de los İsraelyanos.

 Un akordo de paz İsraelo-palestinyano egzije ke los palestinyanos rekonoskan ke el puevlo djudyo es un puevlo de este payis, ke el tyene su propya historya, su propya trajedia i su propya lejitimidad. No avra paz si los ninyos ke se engrandesen en Sisjordania no se ambezan kel Estado ke se topa de la otra parte de la frontyera es el Estado Djudyo lejitimo de un real puevlo djudyo.

Solo el rekonosimyento de İsrael komo Estado Djudyo puede azer de un akordo Israelo-Palestinyano un akto realmente bilateral. İsrael va dar benefisyos efektivos, territoryos i derechos soveranos, i los palestinyanos azeran a Israel el solo dono ke eyos son en mezura de azer; ‘la lejitimidad, el rekonosimyento de muestro nombre, de muestra identidad i de muestros derechos’’. (fin de sitasyon)

Ken tyene razon? La kestyon es importante i en mizmo tyempo muy kompleksa, tal ke fue syempre el destino del puevlo djudyo kontinualmente konfrontado a situasyones difisiles i intrafikadas. No es fasil de ser el shefe de un Governo Djudyo, akosado kontinualmente por problemas ambivalentes. Su kamino es eskarpado yeno de obstakolos a dominar i de entrompyesos a venser. Ma temprano o tadre, el va absolutamente venser.