Atina, anyos final de los 1920… Roza, a su performansa de “danseuse” (bayladera), adjusta i su kapachidad de “kantadera”. Kanta en grego, turko en el Cabaret, ande la deskuvre Toundas, el famozo kompozitor-produktor grego. Toundas la prezenta a “Columbia Records”. Roza aze 2 enrejistramientos en 1928. Esta data, entonses es el empesijo de su karyera diskografika i su evolusyon ke va kontinuar sin interrupsyon asta los anyos 1960...
En los anyos medyanos de 1930 ya aviya enrejistrado mas de 300 kantikas para Columbia Records, en tal ke una de las mas grandes “Star”s de esta kompaniya. Kontribuo en grande mezura al enrejistramiento del “Rembetiko” dicho de Smyrna (smyrnieko). Se puede dizir ke, a eya sola, reusho a propajar el “Rembetiko” i oy en diya su boz es identifikada kon este djenero de muzika. Al lado de esto, naturalmente kantes folklorikos en turko i grego.
Entervalo, Roza esta kada noche en shena, en un Night Club de Atina i ganando muy bueno. En sus roportajes se esta keshando de aver gastado lo mas de su moneda en djoyas, su pasyon… Entonses es una “Star”, la unika akeya epoka, kon kontrato ekskluzivo de una firma (1931-32). Deve azer 40 kantikas al anyo, lo ke le va traer el 5% de kada vendidad.
En poko tyempo su fama depasa las frontieras gregas. Es envitada a performar en Ejipto, Albaniya, Serbia, ande resive un akolyo kalorozo de las komunidades gregas i turkas.
1936-41… anyos de “Diktatura” de Ioannis Metaksas, provokando sensuras en el mundo muzikal grego. Entervalo, en 1940 Italia deklara la gerra a Gresya, ampesa la invazyon de las fuersas alemanas. Ma Roza esta kontinuando a performar en su propio Night Club “Crystal” ke avyeron kon su ijo Paraschos. Malgrado su identitad djudia, reushe a obtener un dokumento falso de “Vaftiz” i se syente en siguridad achakes de su amante aleman.
Portanto, Roza nunka kolavoro kon los alemanes ni estuvo aryento de una traisyon. A la kontra, asta 1943 ke fue deshifrada i aprezada, profitando de su pozisyon privilejyada ayudo las fuersas lokal de rezistensya, salvando djudios de Atina i Salonika, entre eyos su propia famiya, de ser embiyados a Auschwitz. Liberada, paso el resto de la gerra en eskondyendose.
En 1949, retorno a Patras para obtener una mueva karta de identidad i dar konsertos. Ayi enkontro el mansevo Christos Philipakopoulos su grande amor, una relasyon ke kontinuara asta la fin de su vida, malgrado la grande diferensya de edad i el estado de Christos (el era kazado). En el filmo ay sekuensas ande su mujer (oy en vida) esta dando detalyos…
En 1952, Roza vijita los Estados-Unidos. Vyene a Estambol para enrejistrar i retorna a los Estados-Unidos, ande aze un kazamiento “por la forma”, para pueder obtener el permeso de lavorar en este pais. Performo durante munchos mezes en New-York, Chicago i Detroit.
Despues la Gerra, Roza kolavoro kon los maestros del Rembetiko i eskolas de Smyrneiko. Eya fue una kantadera multi-linguista de sorte ke era kapache de kantar en grego, turko, arabo, italiano, ladino i ermenesko. Aun ke no tuvo dinguna formasyon muzikal, kompozo i eskrivyo kantes.
En los medyanos 1970, ya teniya mas de 80 anyos. Kon el renasimiento del Rembetiko, su edad no la impedio de dar konsertos, baylar i kantar en direkto, en la T.V. En una de estas emisyones, i kon Haris Alexiou, famoza kantante grega.
Roza paso en silensyo los anyos final de su egzistensya djuntos kon Christos, en Kipoupoli, ande aviya merkado una kaza a su retorno de los Estados Unidos. Nasida djudia, en 1976 se konvertyo al “Ortodoxie Grego”, se enterro komo tala. (Foto No.5) Entre diversos manaderos, tomi komo baza su biografiya i pasajes del sovredicho filmo. Puedo eskrivir yo i komentar otrun tanto sovre este sujeto, tan rika de peripesiyas fue la vida de Roza. En kurto, era la “Reyna del Rembetiko i Smyrneiko”...
Reelmente desde unas kuantas semanas estuve sintyendo bastante estas melodiyas. Muy probavle ke asta oy no fueron espesifikamente entre mis favoritas. Ma entonses despues de agora?... Vamos a ver...
