La famiya Skinazi en presipyos del 20. siglo abandonaron Estambol para instalarsen en Salonika, dayinda tyerra Otomana. La chika Sara, konosiya solo el turko, reusho a ambezarse i el grego. No se fue nunka a la eskola. Asigun lo ke entendi, se fue a una “mestra”, ande se ambezavan a meldar i eskrivir los chikos del derredor.
Avraam Skinazi todo en lavorando en una fabrikasyon (o plantasyon?) de koton, izo “echos de afuera”(?) para mantener la famiya. Por un syerto tyempo kedo solo en Salonika, myentres ke el resto de la famiya bivyo en Komotini (Gümüldjine). Aki komentaryos diferentes. Unos dizen ke alkilaron una kazika. Otros afirman, la madre se empyego komo “ayudante” en una famiya rika ande se kedavan las noches. Sara le ayudava en los echos de kaza. No se kualo es egzakto. Porke, la vida de Roza en esta etapa, kedo un poko en la solombra.
Enfin, es lo ke es, manaderos afirman a la unanimidad ke, dirijentes de una taverna lokal, par azardo pasando por ayi, sintyeron Sara kantar. Fasinados de su boz, se aretaron para mijor oyir. Propozaron a la madre de Sara de permeter a su ija de kantar en sus “Taverna”. Propozisyon ke ensanyo enormemente la Sra. Skinazi. Se revolto a la idea afilu de un miembro de su famiya devinyendo “artista”…
Ma, ser artista era lo ke Sara keriya mas ke todo. En los roportajes ke dyo anyos despues, atorgo ke el insidente de Komotini fue el “punto desizivo” en su vida i dechido de ser kantadera. En Saloniko ande retornaron poko despues, alkilaron una kaza serka el “Theatre du Grand Hotel”. Artistas del vezindado lavoravan ayi. Sara les ayudo a transportar kostumes de shena i aksesoryos de espektakolo, todo en esperando un diya, ke eya tambien iva suvir en esta shena. En fakto, en esta perioda ampeso su karyera de “bayladera” i “ kantadera” en la shena del “Grand Hotel”.
Era dayinda una adolesente kuando tuvo una aventura de amor kon Yiannis Zardinidis, ijo de una respektavle famiya de Kapadokya. Komo previsto, los djenitores de Yiannis no dan aprovasyon a esta union. Los mansevos portanto kontinuan a frekuentarsen. Zardinidis muere en 1917, deshando Roza kon un ijiko: Paraschos. Syertas fuentes afirman ke Roza, vyendo el chiko komo obstakolo para su karyera, lo abandono a la “kreshe” de una Eglisya en Ksanti. En todo kavzo, ya aviya asigurado el apoyo de los paryentes de Yiannis, ke se okuparon del ninyo. Paraschos Zardinidis anyos despues, fue promotido aviator de alto grado en la Armada Grega. En el anyo 1935 madre i ijo se enkontraron por primera vez i kontinuaron a versen.
Topi una sola indikasyon, sovre un eventual matrimonyo de Roza kon Yiannis. Meldi: “A una etapa de su chika edad, Roza se kazo kon Gianko Sarntinidi. Malorozamente el teniya la pasyon del alkol i muryo myentres ke Roza estava asperando un bebe...” (no ay dubyo ke se trata de Yiannis Zardinidis). En el interview de 1972, Roza deklaro tener tres inyetos. En fakto, en el filmo, la inyeta, ija de Paraschos konto bastante sovre su Nona...
Despues la muerte de Zardinidis, Roza djuntos su famiya, retornan a Atina. Malgrado la fuerte opozisyon de sus paryentes, eya insiste a kedar en el mundo de la Muzika. Deviene el miembro de un ekipo ermeni de artistos de “Cabaret”. La perioda entre los anyos 1910-28 esta oskura, lo ke da lugar a espekulasyones bazadas sovre syertas deklarasyones de Roza. Ansi: “Eya dize aver ampesado a performar a sus 15 anyos. De otra parte, ya savemos ke en 1910 ampeso a lavorar kon la trupa Ermeniya en Pireo. Esto koensida probavlemente kon los anyos ke rompyo kon su famiya en Atina syendo ke eyos no dyeron aprovasyon a su karyera i troko su nombre. Entonses eya se yama Roza Eskenazi, nombre ke va devenir bien famozo en el mundo de Muzika Grega...
A kontinuar…
