Alain Finkielkraut fuertemente sostenido por la mayoria de los myembros entre los kualos munchos mos son konosidos tal Max Gallo, Jean d’Ormeson, Pierre Nora ets... fue elijido a okupar el fotolyo No 21 de la Akademia Franseza, desde el primer torno, kon 16 votos en su favor, 3 por un otro kandidato i 6 abstensyones.
Deke estas 6 abstensyones ke tyenen komo un sonido negativo kuando se trata de uno de los mas grandes filozofos fransezes kontemporeanos, apresyado por la profundura de sus refleksyones i su amor de la kultura franseza?
Todo lo destinava a entrar en esta grande institusyon intelektual, portanto este refuzo de votar affirmativamente en su favor de parte de 6 myembros sin tener un otro kandidato a propozar, konstitue un punto obskuro al kual munchos dan razones diferentes…
Es verdad ke Alain Finkielkraut tyene un karakter impetuozo i intransijente, sus remarkas i sus repuetas en el korso de una diskusyon son envezes bruskas. Su grande amigo Milan Kundera dize: “(İl est)L’homme qui ne sait pas comment ‘ne pas réagir’.” (El es un ombre ke no save komo ‘no reaksyonar’).
El nasyo en Fransya en el anyo 1949 de padre i madre djudyos de Polonya ke fuyeron de sus payis de nasimyento en 1930 afin de eskapar del antisemitizmo virulente de la populasyon, ma durante la maldicha Segunda Gerra Mundyal (komo munchos otros de sus korelijyonaryos refujyados en el payis de Descarte) su padre fue embiado a Aushwitz de ande por milagro pudo salir bivo. Ansi el futuro akademisyano i sus jenitores fueron naturalizados sitizanos fransezes en 1950 un anyo despues su nasimyento.
Alain Finkielkraut fue syempre muy sensivle a la kestyon djudia; el partikolarmente kombate kon vigor el antisemitizmo. El saludo kon aprobasyon la desizyon de Manuel Valls de prohibir los espektakolos de Dieudonné ke, segun su opinyon, son manifestasyones de un antidjudaizmo ‘black blanc beur’*
Tambyen su atamyento a Israel es grande. En djuntos kon Bernard Henri Levy i el defundo Benny Levy, el partisipo a la fundasyon en Yerushalayim del afamado ‘Instituto de Estudyos Levinasyanos’ (İnstitut des Etudes Levinassiennes).
Su amor indefektivle por el Estado Hebreo ke el afirma kon grande frekuensa de una manera muy pozitiva, le permete de ekspresar su dezeo de una solusyon amigavle entre los dos payizes vezinos, el uno İsraelyano el otro Palestinyano, ke devran ser todos los dos independyentes i solidaryos entre eyos..
Si, su İnteres por Israel es enorme ma esto no empide ke uno de sus otros grandes objetivos es la prezervasyon de la rikeza de la lingua i del patrimonyo kultural de su payis de nasimyento.
Diplomado de grandes eskolas i universidades de Fransya, Alain Finkielkraut tyene una devosyon por la kultura de su Tyerra natal a la kuala el keda kaji syempre enkadenado. Uno de sus grandes komentadores dize: “El ama la lingua franseza i la defende mas ke kualkyer otra persona en el mundo, el es atado a los inombravles eskritores i poetas ke la Fransya tuvo asta oy.”
El no aze ninguna konsesyon a los intelektuales ke se obstinan a no kerer ver ni luchar kontra el peligro del aktual emprovesimyento del lenguaje fransez, lo ke riska de krear un idioma mas serkano del de los migrantes ke se instalan en el payis.
Kon razon, Alain Finkielkraut pensa ke la verdadera asimilasyon de grupos de muevos venidos a kual payis ke sea, nesesita un esforso real de adaptasyon de sus parte al modo de vida del payis ke los resive i no lo kontraryo.
En todo kavzo, es una verdad inkontestavle ke el multikulturalizmo es posivle solo si ay una voluntad komun (de las dos partes) de respektarsen i ayudarsen los unos los otros, sin ovligo de renyegar sus fey, ma a la kondisyon de observarla sin ostentasyon i de no kerer forsar kualsikyer otro a akseptar sus paradigmos.
*antidjudaizmo black blanc beur = antidjudaizmo de parte de pretos i blankos del Norte de la Afrika