Muy Keridos Korelijionarios
En estos diyas ke estamos en el periodo de fiestar el “Pesah” nos sientemos de una parte el entusiasmo de la primavera ke sinyefika la renovasion de la natura, i de otra parte mos damos kuenta de la importanasa ke teine la libertad por todos nozotros todo en agradesyendo a El Todo Poderozo ke nos ayego a estos diyas.
“Baruh Şeeheyanu Vekiyemanu Veigianu Lazeman Aze.”
Sigun mi idea el “Pesah” nos aze rekordar el konsepto fundamental de la egzistensia de nozotros los Judios ke es la Libertad kon los termos:
“Meavdut Leherut Umişibut Legeula/Del Esklavaje a Libertad i del kativeryo a Salvasion”
El evenemento de “Pesah” sea a los Ebreos nuestros antapasados i sea a nozotros los desendienes de eyos nos senyala nuestra ofansa a nuestra istorya i a nuestro destino kontra el konsepto de “Mitsrayim” ke sinyefika el esklavaje i el katriveryo.
Aun ke aparentamente el evenemento de “Pesah” nos senyala nuestra salvasion i libertad en konsepto fiziko, lo mas importante es ke nos da a konsentir nuestra salvasion i libertad espiritual i ke por esto es prioritaryo de debarasarnos de nuesros prejuisios i de renforsar nuestros atadijos kon nuestra kultura komunal i kon los konseptos de nuestra relijion.
Sigun este punto de vista teine una grande importansa el edukar a las nuevas jenerasiones verso este buto ke la mas grande prioridad pertenese a las famiyas, a nuestra eskola i a las sinagogas.
Solo en estas kondisiones puede tener el sentido i la valor de esto ke resitamos en la Agada de Pesah:
“Veigadta Levinha/İ Ensenyaras a Tus İjos”
Keridos Korelijionarios
Esta epoka ke la estmos bivyendo nos esta ovligando tambien de renovelar la estruktura de nuestras institusiones konforme a las nesesidades aktualas.
Seya nuestro Prezidente i seya nuestros dirijentes ke yo propio so el testigo de su abnegasion, estan efektuando esforsos konforme a un plano donde los esto de serka siguendo i los esto apoyando efektivamente.
Esto bien siguro ke en avansando estos esforsos nuestras institusiones van obtener un dinamizmo nuevo i sus aktividades van arivar al rendimiento dezeado. Lo ke dezeo es ke todos nuestros korelijionarios les prezenten sus apoyo en todo modo de senso porke solo a esta kondisyon puedemos arivar a un eksito satisfesante.
Keridos Ermanos
“Pesah” es un periodo ke nos adjuntamos kon nuestros keridos i serkanos al rededor del “Seder” i konfirmamos nuestra fe i nuestra konfiensa a nuestro Dyo todo en renovelando la kerensya i amistad entre nozotros.
No dubyo ke nuestros ermanos no mankaran de bien profitar de esta okazion.
Yeno de estos pensamientos i sintimientos, bendigo a todos mis ermanos korelijionarios kon toda mi sinseridad todo en deseando por vosotros sanedad, prosperidad i pas djuntos kon vuestros keridos i serkanos.
Hag Pesah Sameah
Rav İsak HALEVA
Gran Rabino
