“En homenaje a la memorya de Roza Eskenazi, Reyna de la muzika ‘el Rumbetiko’, vos damos debasho estas linyas la primera partida de un largo artikolo sinyado por Coya Delevi i publikado dos anyos antes en la revista El Amaneser No 87”
Esto es una biografiya, la vida enteresante, ajitada i aventuroza de Roza Eskenazi, sovrenombrada “La Reyna del Rembetiko”.
Todo ampeso verso la fin del enverano kon una yamada de telefon ke resivi de unos amigos de Israel. Demandandome porke no ize un artikolo sovre la famoza Roza Eskenazi, adjustando: “No vitesh el filmo “My Sweet Canary” (Mi Dulse Kanaryo)?”
Me sinti konfuza de konfesar ke yo no konosiya el nombre de Roza Eskenazi ni la egzistensya del filmo asta akel diya. I ansi, pensi ke se serro la kestyon. Era yerro de pensar ansi. Me aviya olvidado la perseverensya de mis amigos...
Paso un poko i kon un viyajador me mandaron el D.V.D. del filmo. Tuve la shans de verlo en un ekran de T.V. bastante grande. Sinyado Roy Sher, es komo un viyaje a traves la vida i muzika de Roza Eskenazi. Se esta avlando en grego, inglez, turko, ebreo, ladino, “subtitolos” tambien (asigun los paises de projeksion).
Roza kantava a la manera ke bivyo, kon pasyon, fuego i amor. En el filmo ay pokas vizyones suyas, ande la estamos vyendo de una edad avansada. En realidad el filmo, de karakter dokumentaryo, es el viyaje muzikal de tres muzisyenes de Gresya, Turkiya i Israel ke kontan por primera vez en un filmo, la “Estorya” de la muy apresyada kantadera de Rembetiko. Un viyaje tomandolos de Estambol i yevandolos a Salonika i Atina. Estan sigiendo las trasas del itineraryo muzikal ke desho la Diva. Un viyaje a un mundo desparesido en grande partida i ke sus ekos, kontinuan portanto a sonar en syertas oriyas del Mediterraneo.
Vide el filmo dos vezes, ma lo ke pude fue, azerme una idea jeneral i tomar plazer de sintir las kantikas, ver las panoramas de las sivdades, los muzisyenes, entre otros Yasmin Levy ets… Los dialogos i subtitolos pasando un poko rapidos me desharon en difikultad de pueder kaptar i enrejistrarlos kompletamente en mi memorya. Para pueder azer la biografiya de Roza, deviya bushkar otras fuentes. I ansi fue… Komo syempre, i el azardo me dyo una mano...
Durante el mez de Marso, una trupa de Rembetiko, “Café Aman Istanbul”, performo en un “Music-Hall” de muestra sivdad. En desparte los vimos en kanales de TV, espesyalmente la TRT (Turkish Radio Television), ande izyeron programes direktos bastante largos. Ansi, pude sintir esta muzika “a artar” (a satiété) i entenderla un poko.
Ay diferensyas de datas, nombres ets. en los manaderos ke konsulti. Unos dizen ke la biografiya de Roza publikada en 1982 es “Otobiografiya”. Kostas Hatzidoulis, avlando en el filmo, afirma ke eskrivyo sus propios rekuerdos entitolados “Lo ke me akodro” bazandose sovre los roportajes de Roza. En mi teksto preferi tomar los puntos komun ke topi sovre la vida de Roza, en diferentes fuentes de informasyon.
Nasyo en Estambol kon el nombre Sara Skinazi, de una prove famiya Sefaradi. No esta mensyonado ande, ma en el “ekran” vide kalejas de Balat i la Sinagoga Ahrida. Otra enigma, la data de nasimiento... Se puede dizir ke, tratandose de su edad, Roza, eya propia “bulaneyava” los meoyos. Por egzempyo, en 1972, en una interview dize: “Yo nasi en 1910, ke edad tengo agora?”. Repuesta: “62 anyos!..”.
Durante su karyera guadro su data de nasimiento, syempre deklarando ser nasida en 1910. En realidad, asigun las deduksyones de los ke la konosiyan, es muy probavle ke nasyo entre 1895-1897. La foto la amostra kon sus djenitores Avraam i Flora (Vida) Skinazi, sus ermanos Nisim i Sami. Manaderos afirman ke teniya una ermana (no fue konfirmado).
a kontinuar…
