En un artikolo datado del 25 Marso 2014 Sarah Lalou mos ambeza ke “a la okazyon de una ekspozisyon konsernando el kavzo Alfred Dreyfus, un kolokyo fue organizado por el Embasador de Fransya en Israel ‘Patrick Maisonnave’ ke reunyo profesores fransezes i Israelyanos en la Universidad de Tel Aviv, en prezensya de las bis-inyetas de Alfred Dreyfus i tambyen de Emile Zola”. (fin de sitasyon)
Komo kaji todos lo savemos, el kavzo Alfred Dreyfus kedo komo una mancha doloroza sovre la konsyensya franseza; el oskuresyo la fin del dyezimueven siglo kon el antisemitizmo virulente de una partida de la prensa i de munchos de sus intelektuales ultra nasyonalistos ke akseptaron espontaneamente la infame desizyon de la Korte Judisyal Militarya, la kuala (en el eskopo de salvar el honor de la armada franseza) kondeno a la degradasyon ansi ke al egzilyo i enkarselamyento a vida, un militaryo djudyo inosent al lugar de un grande militaryo kristyano ke era el verdadero kulpavle.
Fue inkontestavlemente un periodo de obskurantizmo para una ancha parte de la Fransya enfohada en su odyo kaji viseral kontra los djudyos, i esto aun la intervensyon de una ombre ekstraordinaryo, invinsivle en su probidad “Emile Zola”, el kual malgrado el peligro de pedrer su libertad i de komprometer su karera de eskritor, lucho facha a facha kontra el fanatizmo kon su selebre artikolo intitulado “J’accuse” (akuzo).
El “J’accuse” de Emile Zola dyo una vigor espesyal a los ke (aun kontraryos a la indjusta kondenasyon) kedaron al empesijo sin verdadera reaksyon i ansi por un largo tyempo la Fransya fue komo kortada en dos, de una parte los dreyfuzardos i de la otra los antidreyfuzardos.
El Kavzo Dreyfus no fue unikamente ‘un konflikto politiko interyor Franses’ ma tambyen un konflikto sosyal al nivel internasyonal, el kual tuvo un impakto bastante fuerte sovre la konsyensya de syertos estranjeros, entre los kualos un djornalisto hungario-austriako nombrado ‘Theodore Herzl’ ke se topava en Fransya, djustamente para segir la evolusyon del evento en kestyon, por kuento del diaryo “Die Neue Freie Press”.
El sitio Wikipedia mos dize ke: “Komo Theodore Herzl el mizmo lo afirmo, es despues de aver sigido el kavzo Dreyfus ke el entendyo realmente la nesesidad absoluta de un Avrigo permanente para el puevlo djudyo, deklarasyon ke el desvelopo en su livro “Yudenstaat butte” (el Estado de los djudyos), ovra ande el ekspozo los tres primeros prinsipyos del Sionizmo: “Egzistensya de un puevlo djudyo”, “İmposivilidad de su asimilasyon de parte de otros puevlos” i “Kreasyon de un Estado partikolar ke va asumir el destino de este puevlo”.
Es en data del anyo 1897 ke el kongreso de Basel adjunto un kuatren prinsipyo: “El derecho de los djudyos de instalarsen en Palestina”. (fin de sitasyon)
Esto dicho, una kestyon mos vyene al tino: “Es ke oy en dia en Fransya ande la kondisyon de los djudyos troko de una manera espektakular i ande muestros korelijyonaryos tyenen akseso a postos governomentales muy altos, el antisemitizmo dezaparesyo kompletamente? Es ke el rasizmo fue enteramente eradikado?
No muy leshos en el tyempo despues el Kavzo Dreyfus, el fashizmo izo su aparisyon en Italya, el kual renforso el ideal nazi kon su kodigo kriminal; kaji paralelmente, a un nivel puedeser un poko manko inhumano, el rejimen del Mareshal Petain mando a la muerte una grande kuantidad de djudyos.
Aktualmente, el ultra nasyonalizmo persiste syempre en el korason de una partida del puevlo franses, komo tuvimos la okazyon de konstatarlo kon el kavzo Dieudonné i los rezultados de la ultima eleksyon munisipal ke markan la evidente progresyon del klan ‘le Pen’ konsiderado unos kuantos anyos ante komo partido marjinal gzenofobo i antisemito.
La Fransya aklarada esta aktualmente inkyeta i tambyen la Komunidad Djudia eya muy inkyeta. De una parte ‘la intensifikasyon del ultra nasyonalizmo’ de la otra ‘los aktos de vandalizmo de una chika minoridad muzulmana franseza’ kon sus golpes kaji espontaneos kontra mansevos djudyos ke yevan una kipa.
En este momento, mos topamos delantre un paradokso difisil a rezolver “Aun ke el ultra nasyonalizmo i el djihadizmo son (lokalmente en Fransya) dos partidos absolutamente enemigos, sus progresyon simultanea estimula fatalmente la inimistad kontra el djudaizmo en su evolusyon.
