Los premyos (ödül) tradisyonales (geleneksel) de ‘Vertud’ (fazilet) i ‘Byenfezensya’ (hayırseverlik), de muestra komunitad ke se organiza kada dos anyos; de 1976 fina oy, se dyo kon una seremoniya organizada djugeves ultimo en una asossyasyon de la komunitad.
El Presidente ‘Elyo Medina’ de esta organizasyon, izo una avla en dando a entender la sinyifikasyon de estos premyos.
Este premyo se da a la memorya de la ija del konsol (konsolos) de la Amerika ke se topo en la Turkiya,
‘Jane Selma Elcus’; a una mujer ke aze sus doveres de famiya perfektamente, i ke konsakro su vida a las ovras de byenfezensyas, para pueder salvar las personas de la mizerya i de todo lo negro.
Kada ovra i organizasyon de muestra komunitad mostro un kandidato para este premyo de Vertud ‘Jane Selma Elcus’. Estas kandidatas son;
• Klara Arditi de ALEF
• Şeli Elmas de Golden Age
• Lili Salerno de Göztepe Kültür Derneği
• Dezi Varon de İhtiyarlara Yardım Derneği
• Fortüne Asal de la Komunitad djudiya de İzmir
• Meri Erim de Matan Baseter
• Raşel Kutlar de la Mişne Tora
• Eti Özlevi de Or-Ahayim
• Raşel Özrofe de Yetimleri Koruma Derneği
Este anyo, ‘Fortüne Asal’ de la komunitad de İzmir gano este premyo onoravle, a kavza ke ay 60 anyos ke eya lavora de alma i korason en la komunitad kon todos, para enalteser el nivel (seviye) de sus vidas, i para darles la kerensya menesteroza ke se esta aminguando oy malorosamente.
‘Sibel FRANKO’ gano el premyo ke se da a la memorya de ‘Josephine MARCUS’.
Este premyo se da a una volontarya ke lavora en todo modo de espasyos, de ovras en la komunitad de alma i korason.
‘Sibel Franko’; es una manseva kon kara riyendo, ke menaja (idare etmek) a todos, kalma, (sakin), ke aze su echo kon kayades i de una manera perfekta, ke dize si, a todos los ke keren una ayuda de eya, eya buena mujer, madre perfekta i muy devuada (özverili), en las aktivitades (faaliyet). No ay una aktivitad ke se organiza sin Sibel, porke es muy kapache.
Todos en el doredor (etraf) la keren muncho byen.
Un premyo de medikeria (tıp) a la memorya del dentisto ‘Yasef Yahya’ ke peryo su vida muy mansevo, se dyo al mansevo ‘Emil Aliyev’, un joven de Azerbeycan sempatiko i entelijente ke esta estudyando en Estambol.
‘Yaşar Paker’ (ke este en ganeden), fondyo un fon para los estudiantes de muzika, porke el era un muzisyen, i tomava muncho plazer de la muzika. A su memorya; ‘Linet Şaul’ la Soprano de İzmir gano este premyo i kon su boz de seda kanto 3 aryas de las operas konosidas. Mos dyo un pranso (şölen) de muzika.
‘Alberto Modiano’ el fotografo famozo de muestra komunitad, gano el premyo de kultura.
El, kon sus fotos en las bodas i en las aktivitades, eskrivyo un livro enteresante.
‘Metin Delevi’ ombre de sensya, kon sus bushkidades (araştırma) en sujetos diferentes, transfero (aktarmak) muncha saveduria (bilgi) al puevlo. İ el meresyo kon su kapachitad i su konosensya el premyo de Kultura, kon Alberto Modiano endjuntos.
Un premyo de tentativa (girişimci) a la memorya de ‘Alp Alkaş’ el ijo de ‘Cina i Avi Alkaş’ myembros konosidos i amados de muestra komunitad, fue dado por la primera vez. ‘Alp Alkaş’ (ke este en ganeden), mansevo de grande valor, braso derecho de su padre en el echo, muy korajozo i reushido, un ijiko kerido por todos los amigos i los ke lo konosiyan, novle (asil) i kalmo, syempre kon kara riyente; el realizo grandes kapachitades en su vida muy kurta malorosamente.
Ke su alma repoze en ganeden, AMEN.
No mos vamos a olvidar de el nunka; i para akodrarmos de todo lo ke realizo, su madre i padre kreyaron un Fon a su nombre.
Este premyo fue meresido por ‘Yomi Kastro’, mansevo i amigo de ‘Alp’.
A parte de esto, dyeron una plaket a la famiya de ‘Mordo Rumi’ por la partisipasyon (katkı) de BURS ke tuvyeron para los estudyantes.
A kuatro famiyas ke izyeron una grande donasyon por la “KOLONİYA de Burgaz” se ofryo un Dokumento de Agradesimyento (Teşekkür Belgesi). Esta donasyon fue para los 60 kriyaturas ke vinyeron a la koloniya para pasar dos mezes de vakansas. Estas famiyas son: ‘Eliza Albert Köksal’, ‘Erika Erol Kiresepi’, ‘Sandra Erol Kohen’, i ‘Suzi Lazar Mitrani’.
La seremoniya se termino kon las palmas de los partisipantes ke asistyeron a esta organizasyon ke se preparo kon muncha aplikasyon (özen) por la parte del dentisto ‘Seyfi İşman’.
‘Seyfi İşman’ preparo esta nochada, en pensando a todos los detalyos de una manera perfekta.
Ke muestra Komunitad tenga syempre la kavesa alta.
