La prodaktividad de un judyo libro en un pais libro

Dora NİYEGO Judeo-Espanyol
5 Mart 2014 Çarşamba

El fondador de ‘WhatsApp’, Jan Koum, vendio esta aplikasion de telefon a Mark Zuckerberg, el fondador de Facebook, por dizimueve miliardas de dolares.

Jan Koum, nasido en los 1970’s en la komunista Ukrania, emigro kon su madre a Kalifornia kuando teniya diisesh anyos. Koum i su madre se fuyeron de la ajitasion politika i del antisemitizmo del pais. Ma su padre no se puido ir kon eyos.

Koum fue ovligado de lavorar en munchos echos para pueder mirar a su madre, i kurarla porke su madre sufriya de kanser. Kuando teniya diziocho anyos, Koum empeso a ambezarse el ordonador, i duspues se unio kon un grupo de hackers. Aya, lo konosio a Sean Fanning ke es el fondador del siteo de muzika, Napster. Mas duspues, Koum entro a la Universidad de San Jose, i las noches lavoro komo gardia de seguridad en los ofisos de Ernst&Young.

En el anyo 1977, Brian Action ke era responsavle de publisidad en Yahoo, izo una entrevista kon Koum para darle un echo en los sistemas de seguridad de Yahoo. Kon tiempo, los dos ombres se izieron amigos, i empesaron a irsen endjuntos a djugar futbol, a eskiyar, i a otros entretenimientos.

En el anyo 2009, Jan Koum empeso a pensar komo se puese fondar una aplikasion ke iva permeter a azer kontaktos, mezmo kuando la bateriya del telefon esta basha. Mas tadre, se adjunto kon el fondador ruso İgor Solomennikar, i endjuntos kitaron la aplikasion ‘WhatsApp’, en el Febrero del anyo 2009. Mueve mezes duspues, Brian Action refuzo las pozisiones ke le prezentaron en Facebook i en Twitter, i se adjunto kon eyos.

En sinko anyos, ‘WhatsApp’ gano 450.000 miliones de uzarios (kullanıcı). Jan Koum fue siempre prudente en su echo, komo en los diyas ke biviya en Ukrania. ‘Me engrandesi en un lugar ande todo lo ke diziyas era espiyonado’ esta diziendo Koum.