Newton dize: “La Amistad es konstruir un ponte entre las personas. Ke pekado ke munchos estan fraguando murayas al lugar de pontes…” Ma, mozotros keridos amigos, komo dize el Prof. Hayim Vidal Sephiha “todos los Djudios ke keren salvar lo muestro”, mozotros reushimos a fraguar este ponte. Estamos logrando a salvar “Lo Muestro”, a konservar muestra İstorya, Kultura i Lingua, muestras valores tradisyonalas ets...
Kije, sovre todo ampesar ansi mi teksto porke ya se ke muestro grande amigo, el Sr. Sephiha lo va meldar en esta pajina. Resientemente, resivi su livro “Le Judéo-Espagnol”, kon su autografa, lo ke me izo un plazer imenso mesklado de orgolyo. Mi senso etiko me konseja de adjustar ke, otras 4 amigas resivyeron este lavoro del Profesor. Por la ora no supe ken son.
En repuesta a mi mesaje de rengrasyamiento, el me eskrivyo: “Apresyo los artikolos de la totalidad de esta ultima pajina en Judeo-Espanyol, ke meldo kada semana de la primera linya asta la ultima…KON MUNCHO KARİNYO..”
Keridos amigos, este teksto lo deviya eskrivir la semana pasada, despues de aver meldado el Şalom del 12 Febrero. Ma tuve impedimientos urdjentes i pensi: “Mas vale tadre ke nunka”. Bueno, kualo meldi en la gazeta? En la tresera pajina, una novela dizyendo: “Diyalog E-Dergi selebro kon un kokteyl su sinken (5) aniversaryo”.
Diyalog es una Revista digital “bimestral”.(*) El Sr. Rafael Algranati, Direktor Jeneral de publikasyon, es tambien un eskritor de muestra gazeta. Tuvimos okazyones de korresponder de vez en kuando. Fui envitada a la selebrasyon de İzmir (Smyrna), a kuala reelmente dezeyariya partisipar mizmo sin dinguna envitasyon. Enfin de kuento so un miembro de la Famiya Diyalog. Me kontenti de azer un telefon i ekspresar mis suetos de reushita i de vida larga a Diyalog.
Desde los presipyos del 2011 ke eskrivo en Diyalog, seya en judeo-espanyol, seya en turko. Antes kaji 3 anyos aviya empesado a eskrivir en turko mis rekuerdos debasho el eslogano: “Galata’lı Küçük bir Kız”. (Una İjika chika de Galata). Lo programi de manera a terminar mi eskrita en Desembre 2013 en kompletando 80 anyos. İ ansi fue... Naturalmente, esto kontinuando a eskrivir en Diyalog en judeo-espanyol i turko.
Mis rekuerdos son muncho mas ke una simple otobiografiya. Porke di espesyalmente la fuersa a muestras raizes, tradisyones seya relijyozas, seya folklorikas. La vida de antes 65-70+ anyos en Galata o en Tekirdağ ande pasava mis enveranos de la primera mitad de los anyos 40… Anyos de restriksyones, de reselos kavzados por la Gerra…İ otros eventos importantes ke konosimos los de mi edad akeya epoka. Mi rekolyo es “una tuvla” en el Ponte de Amistad, ke espero azerlo un chiko livro para deshar a mis inyetos.
Echando un ojo a la pajina de Judeo-Espanyol: Komo syempre, la kerida Klara Perahya, kon su artikolo konsernando el Prof. Martin Karplus. Un teksto bastante edukativo, ansi ke el komentaryo de Klara…
En la mizma pajina, en desparte de mi chiko teksto, estamos vyendo el artikolo de muestra amiga Şeli Gaon. Es un kuento rendido de la inogurasyon de la Ekspozisyon “Vestimientas Djudias en el İmperio Otomano”, en el Muzeo Djudio. No tengo nada de adjustar a los propozitos i komentaryos de Şeli, visto ke no me topi ayi akeya tadrada.
Fue solamente una semana despues, demanyana del 11, ke vijiti el Muzeo. Aviya i un grupo de jurnalistos enteresandosen tambien a los objektos del Muzeo i demandando detalyos. Un kanal de la T.V Turka, en su program de aktualidad semanal, dyo en ancho, filmado en el Muzeo mizmo, un “interview” kon Silvyo Ovadya, eksplikando el eskopo i la importansa de esta ekspozisyon.
Enfin, el enteresante artikolo de la pajina 4, el “reportaje” Una Ambasadora del Judeo-Espanyol en Texas”, realizado kon Rachel Amado Bortnick. En la rubrika “Herkesin anlatacak bir Öyküsü var” (Todos tienen una estorya para kontar), muestra amiga Dora Niyego reelmente tuvo una idea formidavle en azyendo este lavoro en turko. Ansi, se pudo dar a konoser Rachel a mas munchas personas. Porke, los ke meldamos i eskrivimos en J-E konosemos muy bien, “la Arkitekta” del “Ponte de Amistad” ke eya fraguo en 1999.
a kontinuar…
