Cem Mansur, DIRIJO KONSERES EN ISRAEL

Dora NİYEGO Judeo-Espanyol
19 Şubat 2014 Çarşamba

Las semanas ke pasimos, Cem Mansur estuvo en İsrael para dirijar la Orkestra Senfonika de Haifa, i otras orkestras en Kiryat Haim, i en Petah Tikva.

Diez anyos antes, Mansur estuvo en İsrael i dirijo la orkestra senfonika de Beer Sheva.

El periodiko Haaretz izo una entrevista kon Cem Mansur.

Mansur disho ke estudio en Londra, i es pariente de Meir Dizengoff, ke fue el primer alkalde (belediye başkanı) de Tel Aviv. Meir Dizengoff no tuvo ijos. Su ermano tuvo tres ijas. La una de estas ijas, Adela, ke estudio enfermeria en Odessa, se kazo kon Nedjmettin, ke es el ijo del Pahsa Turko, Ali Mansur. Adela i Nedjmettin tuvieron dos kreaturas, Ali i Fatma. Ali es el padre de Cem Mansur. Ali, tambien, se yama Gabriel, i Fatma se yama Ruth. Cem Mansur bive en Estambol, ma tiene parientes en İsrael, de la famiya de Meir Dizengoff. La madre de Cem Mansur se yama Jackline. Jackline es de una famiya judiya ashkenazi.

Mansur esta diziendo ke se engrandesio kon la konsiensia de sus raizes. Mansur es un situayeno turko ma no es relijiozo del todo.

En el tiempo antes de Atatürk, munchos padres preferaron ke sus ijos tengan una edukasion evropeena. Mansur esta diziendo ke el no tomo edukasion oriental, i no teine dinguna relasion kon la muzika oriental.

Cem Mansur empeso a estudiar muzika a la edad de dizimueve anyos en la Angletera. Su famiya lo aviya embiyado a la Angletera para ke se aga elektrika enjenior. Duspues ke estudio medio anyo, desho la universidad, i torno a la muzika. Durante un anyo, tomo korsos privadas de muzika, i duspues fue akseptada a la Eskola Guildhall de Muzika i Drama. Duspues ke tomo el degre de Master de esta eskola, Mansur torno a Estambol, i se izo direktor de la Opera, ande lavoro en esta pozision por ocho anyos. En el anyo 1989, se fue a la Angletera de muevo, i aya se izo Direktor Prensipal de la Sivdad de Oxford Orkestra. Duspues de este anyo, bivyo un sierto tiempo en Estambol, i un sierto tiempo en la Angletera. En el anyo 1998, empeso a dirijar la Orkestra de Kamara de Estambol. Ay dos anyos ke se enstalo por entero en Estambol kon su mujer.

Cem Mansur esta diziendo ke en Estambol ay miles de personas ke asisten a los konseres de la muzika klasika. El Ministro de Kultura i Turizmo esta dando apoyo a todas las orkestras, mezmo los konservativos. Ma no ay grande salas de konserto por el momento. La opera se serro por kuatro anyos por reformas, i ay una demanda ke las reparasiones se realizen presto, por ke estan tadrando.