En el 14 de Febrero se selebra la fyesta de los enamorados. Kada uno lo aze asigun el dezeo de su korason. A esta okazyon, pensi de analizar otruna vez los sentimyentos en muestro siglo. El benadam no es solo un fenomeno de karne i de guesos. Tyene tambyen meoyo, i korason. Kijo dezir, tyene fakultad de pensar, de djuzgar, desidar i tyene sentimyentos. Ma, estamos vyendo ke en el 21. Siglo eyos estan, si no abandonados, por lo menos, eskondidos, kamuflados.
Alegrarse, atristarse, reir, yorar, kerer, amar, eskarinyar ets… estan en sigundo plano, guadrados debasho de un septisismo o una falsa indiferensya. Afilu, la manera de pensar, la filozofiya estan trokando de djenero. Naturalmente, son sensasyones abstraktas, par konsekuensa, un poko difisil de eksplikar, de transformarlas en byervos. Puede ser ke esto egzajerando un poko tambien.
Estamos, por siguro, onorando la teknolojiya del 21. Siglo. Ma, ay una kestyon o dos, ke se pozan: “Porke se deve sakrifikar los sentimyentos para pueder alkansar a la teknolojiya? No se puede bivir los dos endjuntos?” Efektivamente, se esta vyendo las maneras diferentes de pensar, afilu en los livros, (o en syertos) ke estamos meldando, los filmos (la mayoriya) ke se estan projetando. Se esta remarkando un aleshamyento de los sentimyentos. Sin kerer egzajerar, puedo afirmar ke las relasyones sentimental, eyas afilu trokaron. El materyalismo esta tomando munchas vezes el lugar del romantismo.
En el mundo del 21. Siglo, ande se pyedro la uzansa afilu de eskrivir letras, la posta elektronika, (e-mail) los mesajes por G.S.M, estan triunfando. Las letras en jeneral ma, espesyalmente, las de amor, no eran -o, no son- solamente un medyo de komunikasyon, ma tambyen, eshantiyones de literatura. Komo los filmos nostaljikos preto i blanko, tambyen las letras manuskritas eran mesajes de amor, de amistad, en kurto, de sentimyentos. Egzaktamente komo disho Jean- Jacques Rousseau: “La korrespondensya de los amigos, redobla sus egzistensyas...”
Si me akodro bueno, en un vyejo artikolo miyo, tengo eskrito ke el amor se transformo en un materyal de komercho. Kazamyentos kon kontratos!…Los amores lejendaryos ke uzavamos a ver en los filmos preto i blanko, al pareser kedaron en el pasado. Por siguro ke egziste oy tambyen munchas personas ke toman plazer del romantismo, esto no se puede enyegar. Es de pensar ke el estado aktual, es komo una ola de moda, un “trend” ke va trokar kon tyempo. Estas personas se van a render kuento, ke el materyalismo no es sinonimo de felisidad.
Un profesyonal, a la pregunta: “Es ke en el 21. Siglo, el amor i los sentimyentos en jeneral, estan konservando sus aktualidad, sus ermozura?,” respondyo ansi: “Puedo responder “si” en partida, en una manera limitada. En las komunidades avansadas en teknolojiya, la nosyon de famiya esta komo pyedrendo su importansa de diya, en diya. Sentimentalmente, la persona se esta arrondjando a la soledad. En estas komunidades el materyalismo esta mas dominante. Ma, no devemos olvidar ke la persona nesesita kerensya, amistad, mizmo si no bive o no konose el amor. A lo menos, mos kereremos i mos respektaremos de parte a parte...”
Estas palavras eksprimyendo la opinyon de un espesyalisto, no estan muncho enkorajando. Se estan, afilu, aserkando un poko del pesimismo. Ma, yo kero pensar, syendo ke los sentimyentos syempre fueron umanos, una parte inseparavle del benadam, no deven, no pueden despareser. Kero kreer ke estan eskondidos o enyegados en partida, por la ora...Ya es verdad, ke en una mezura, estamos bivyendo una epoka de teknolojiya, ke el materyalismo tomo el lugar del romantismo. En vezes penso ansi, ma no syempre!…Esto sigura ke oy en diya, el romantismo tyene su lugar eskojido. Lo estamos vyendo, kada anyo, en las selebrasyones del 14 Febrayo, a kualas kero partisipar kon mi chika poeziya...
ES PASHARO
EL AMOR
Penso yo ke, ombre o mujer,
Deve saver, i byen saver,
“Amor” es djugo de shansa...
Ay ganar, komo ay pyedrer,
İ, syempre no se alkansa,
A ser amados, a kerer...
Ke esto no te dezespere!
Avra korason ke te espere.
Es i un pasharo el “amor”,
Bushka kon fervor i ardor,
Ande podriya pozarse,
Sin dezeo mas de bolarse...
