Las vistimyentas de los Djudyos en el tyempo Otomano

Şeli GAON Judeo-Espanyol
12 Şubat 2014 Çarşamba

La ekspozisyon de ‘Las Vistimyentas de los Djudyos en el Tyempo Otomano’ se avyo el 05.02.2014 en el Museo de ‘500.Yıl Vakfı Türk Musevileri Müzesi’ kon un kokteyl i kon muncha djente ke vinyeron de rejyones diferentes.

Setenta figuras (gravür), kart postales i fotografias del tyempo Bizantino asta el 19 en syeklo; tomaron lugar en esta ekspozisyon.

Tres artistas de minyaturas (minyatür) emplearon las kolores de esta epoka i krearon (gerçekleştirmek) una ekspozisyon de illustrasyones i tres reproduksyones de vistimyentas kuzidas por dos artistas en el ‘Olgunlaşma Enstitüsü’.

El kurator (küratör) Silvyo Ovadya izo una avla en dizyendo; ke prezentar este materyal a la opinyon publika (kamuoyu), tyene una fonksyon emportante en los puntos de vista de mostrar a todos ke en el tyempo otomano aviya munchos kultivados de diferentes relijyones i la istorya de la komunitad djudiya ke esta bivyendo en la Turkiya. Lo emportante es de pueder documentar (belgelemek) esto todo kon un album kontenyendo las eksplikasyones en ingles i en turko para ke este lavoro se transfere a las jenerasyones vinideras. Esta ekspozisyon se realizo kon la kontribusyon (katkı) del jurnal ‘ŞALOM’.

El kandidato (aday) del presidente de la munisipalitad de Şişli embiyo una korona ke Silvyo Ovadya lo remersyo.

El modisto Cemil İpekçi izo una avla en dizyendo ke sus ansetros son djudyos vinidos de Selanik.

Su famiya es de los sabetaistos i ke son los ijos de una kultura de 10.000 anyos.

Tyenen una uzansa de un aniyo ke les kedo de Sevilla. Enriva de este aniyo ay un leon. Kuando la famiya arivo a Venedik, brodaron enriva del leon una korona (taç) ke es el sembol de la independensya. Venedik era la salvasyon para los djudyos akel tyempo.

El va transferar este aniyo al ijo el mas grande de la famiya ke es el ijo de su ermano.

Termino sus palavras en dizyendo ke: “El Arte i La Kultura es un Kulto, Una Orasyon (ibadet)”.

Todos los desenes, los motivos son muy emportantes. Kada uno i uno tyene un senso diferente. Dan mesajes a las personas.

Aviya entre los envitados munchos jurnalistos enteresados. Fue un evenemento istoriko por la primera ves.

El artisto, el pintador (ressam), el poeto (şair)

Habip Gerez vijito este dia emportante de la ekspozisyon.

El braso derecho del Presidente de la komunitad Moris Levi; remersyo Cemil İpekçi de su prezensya en dizyendo ke onoro a todos kon su egzistensya.

Fue un dia reushido grasyas al ayudo de

Emel Benbasat i Nisya Allovi ke penaron de dia i noche kon grande veluntad.

Dezeamos evenementos diferentes organizados por muestra komunitad, para azer konoser lo ke somos i la valor ke tenemos.