Renée Veissid vyene de serrar los ojos por syempre despues largos mezes de sufriansa fizika, entornada de la profunda kerensya de su ija i de todos sus serkanos ansi ke de la konsiderasyon i enorme afeksyon de inombravles amigos.
Es una grande dama de muestra komunidad ke vyene de dezapareser. Muy intelijente i kultivada, ansi ke muy franka i derecha de karakter, Renée supo guadrar su simplisidad durante el largo tyempo ande, mujer de Jak Veissid, eya fue la Primera Dama de muestra kolektividad.
La enkontri por la primera vez ay de esto kaji 50 anyos, en el Grupo Esther Tani “de bendicha memorya”; Renée kon tambyen otras amigas ivan de kaza en kaza en baryos pekunyaryamente muy desfavorizados ande famiyas enteras bivian en un espasyo minimo i ande los eskalones a suvir para ayegar a sus morada paresian derrokarsen debasho kada patada.
Este grupo de amigas iva regularmente kada mez para yevar un chiko ayudo a los ke realmente bivian debasho el umbral de la provedad, i tambyen para mirar de topar una solusyon a problemas difisiles a rezolver. I un dia (me akodro komo si era ayer) Renée Veissid avia dicho: “Ah si teniamos un lugar ande abrigar todos estos desmazalados!”
Anyos mas tadre, es de estas mizmas palavras ke nasyo el proyekto de krear “el Barınyurt”, en el eskopo de rekojer todos estos desmazalados debasho un mizmo techo.
Renée, ke tu alma repoze en paz!
Muestras kondolensas a su ija Edna i a todos sus keridos de los kualos partajamos sinseramente la tristeza.
