Prof. Martin Karplus, uno de los tres loreatos kon Michael Levitt i Arieh Warshel, de esta eminente distinksyon ke es el premyo Nobel de Biokemika komputasyonal.
Visto mi kompleta inyoransa de este sujeto, devo konfesar ke no entendi grande koza de la larga parte del teksto konsakrada a eksplikasyones syentifikas inaksesivles a mis esforsos de komprensyon, por kontra meldi kon plazer las primeras pajinas ande el grande syentifiko mos avla de su chikes, komo tambyen de la atmosfera familyal ande el se engrandesyo.
Durante su ninyes Martin Karplus bivyo en un espasyo de estudyo i se puede supozar de meditasyon i largos kambyos de ideas. Munchos de sus antepasados eran doktores en medikeria i ombres de alta kultura, vidas dedikadas a la refleksyon i a kestyones i temas etiko-intelektuales.
Es muy provable ke en munchos de entre eyos se topava el ‘esprito de analizis i deduksyon talmudiko’ mesklado al estudyo de las syensyas modernas.
Antes el horrivle kaos de la Shoah (en la Almanya i la Austria) eran nombrozas estas famiyas djudias de lingua jermanika ke tenian una kultura jeneral superyor a la de los otros sitizanos. Unas kuantas de entre eyas tuvyeron el presentimyento ke el odyo i el menospresyo salvaje ke las entornavan pudian tener las konsekuensas desgrasyadas ke fatalmente se avian abatido sovre muestros ermanos, lo ke las pusho a salir a tyempo de sus payis de nasimyento.
Tal fue el kavzo de los paryentes de Martin Karplus, loskualos pudyeron salvar en fuyendo por empesar a Fransya i despues a los Estados Unidos.
Por kontra, malorozamente, munchas otras personas syempre de alto nivel intelektual, enfohadas en una fidelidad syega por sus tyerra natal i por la kultura a la kuala eyas eran enteramente integradas, desparesyeron por syempre en las tinyevlas de una epoka maldicha, sin deshar trasas de sus pasaje en este mundo.
La Shoah no fue solo la trajedia irreparavle de la muerte de 6 milyones de djudyos i de munchas otras viktimas ke bivyeron el mizmo suplisyo; eya fue igualmente (para el potensyal kultural internasyonal de la humanidad) una inmensa pedrita de saviduria i de refleksyones ke no tuvyeron el tyempo de ser ekspresadas.
Revinyendo a Martin Karplus, todo en syendo konsiderado aktualmente komo un savyo amerikano, el kedo muy atado a la Fransya de despues la gerra.
Segun lo ke me ambezi a la sigida de una chika investigasyon: “Martin Karplus lavora prinsipalmente en Harvad, ma igualmente tyene muy rezyas relasyones kon la Fransya. El fue profesor en Orsay i Paris, al empesijo komo invitado i poko mas tadre komo titular. I tambyen, grasyas al dekreto ‘Karplus’ el es syempre desde 20 anyos ‘profesor en Strasbourg’.
A notar ke es la primera vez ke un premyo Nobel fue atribuido a la Biokemia komputasyonal por lavoros de modelizasyon i de simulasyon sovre ordenador.”
Esto dicho, personalmente no me puedo detener de avlar de un otro sujeto, el kual es ‘el maraviyozo djesto de deontolojia superyor’ ke Martin Karplus kumplio en esta sirkunstansya.
A la fin de su muy largo artikolo publikado antes la distribusyon de los Premyos Nobel 2013 (artikolo del kual vos avli al empesijo del prezente eskrito), Martin Karplus metyo una lista igualmente muy larga de los syentifikos kon los kualos desde 30 o 40 anyos, el kolavora o kolavoro a un syerto momento sovre este mizmo sujeto .
‘Este djesto de ekidad’ va mizmo mas leshos ke los simples prinsipyos de la deontolojia klasika, este djesto es la atestasyon de ‘un respekto en direksyon de los otros’ komo una voluntad de aklarar el kamino de los ke fueron sus kompanyeros de lavoro.... un djesto ke me aze akodrar el maraviyozo tema filozofiko de Emmanuel Levinas: “Le visage de l’autre”.
