No seriya yerrado de dizir ke Salonika fue la unika sivdad ande los djudios eran en mayoriya. Asta el anyo 1912 fue la Kapitala de los djudios de la Diaspora. Myentres la primera Gerra Balkanika la sivdad kayo en la mano de la Armada Grega. De su populasyon de 150.000, los 80.000 eran djudios, el resto turkos i gregos. No kero dar un shifro ke podriya ser inegzakto, konsernando la populasyon djudia de oy. Komo lo indiki en mi primer teksto, ay kontradiksyones. Lo ke se, en mis bushkidades de antes 5-6 anyos no alkansava ni a 1.000…
En 1492 de Espanya, en 1536 del Portugal, miles de djudios ekspulsados vinyeron en dos olas a Salonika i otras sivdades del İmperio Otomano. Konservaron sus Lingua, Tradisyones, Kultura i saveduriya. Adelantaron en el komercho, industria. Su pozisyon de sivdad-porto, prokuro a Salonika munchos avantajes i gano la identitad de “Sentro Kultural Djudio”. Fue la mas desvelopada sivdad del İmperio Otomano, la mas embidyada de los Balkanes. Aki, sitasyones de ansyanos lavoros miyos:
“Despues de la Gerra Balkanika en 1912, la sivdad kedo en los gregos. İ, otruna vez el mundo de los djudios se iva trokar, se ivan a topar facha a facha kon eventos oskuros… En 1916 los Zeplines almanes dos vezes bombardearon Salonika…En 1917 un grande fuego desho en sinizas una konsideravle partida de las maales djudias..”.
İ aki, un paragrafo tomado del jurnal “Vanguardia”: En Estambol, oy en diya miles de personas estan reushendo a tener bivo el Espanyol de la “Era Media”.Ma, en Salonika, solo un chiko grupo de djudios arriva de 60 anyos estan kontinuando a avlarlo. İ esto, solamente en el sirkolo familial, entre eyos i nunka afuera de kaza…
“Es enteresante, los aedados estan preferando avlar el judeo-espanyol i no el grego. Esta manera, se estan entendiendo mijor de parte a parte. Por eg.una persona aedada, kon Alzheimer, absolutamente no se akodra el grego. En su memorya tiene el Kastelyano de la Era Media. İ muy probavle, asta la fin de sus diyas va avlar esta lingua. Par kontra, los muevos nasidos nunka van a pueder (o muy poko) sintir la lingua de sus ansestros…”.
Entre las jenerasyones ay un “abismo” (uçurum) ke en syertas famiyas abashando asta 5 anyos. Ansi, el miembro de una famiya nasido en 1961 mas o menos konose el judeo-espanyol. Su ermaniko nasido en 1966, no konoso ni un byervo de esta lingua. En los presipyos de los 2000, kon el eskopo de arranjar en una mezura esto, ampesaron a organizar el “Kavedjiko”.
Los Alhades se estan arrekojiendo en este Café, kontando sus rekuerdos, dandosen de parte a parte reseftas kulinaryas, sus estoryas i afilu sus byervos de judeo-espanyol (vokabularyo). Puede ser ke deviya yo konjugar al modo pasado i dizir: se arrekojiyan??.. Reelmente keriya saver si oy egziste este “Kavedjiko” o kedo en el Salonika de ayer??…
Salonika… Sivdad ande se avlava lo mas en Judeo-Espanyol…Oy esta luchando para no deshar murir esta idioma i tambien sus tradisyones. Kero mensyonar el “Proyekto Centropa” del Sentro de bushkidades. En rezume, antes unos kuantos anyos ampesaron a investigar las Komunidades Djudias de la Evropa Sentral i del Este, tambien de Turkiya, sovre sus vida en el 20. Siglo.
En el kuadro de este proyekto se izo entrevistas kon personas de una syerta edad, se arrekjyo una arshiva de sus rekuerdos. En Salonika, un ekipo de mansevos akademisyenes, enkavesados por la Dra. Rena Molho, partisiparon a este Proyekto. Ansi puede ser ke se reusho a salvar una partida del Patrimonyo Kultural Sefaradi de la Komunidad Djudia de Salonika.
Avlimos por la Salonika de ayer. Ke puedo dizir por la de oy?. Antes de terminar, kero tresladar aki una novela bastante mueva ke meldi en muestro Jurnal. “La Gresya anunsyo el proyekto de fondar el “Sentro de la Shoa” en la rejyon ande los nazistos arrekojiyan los djudios destinados a ser embiyados a los kampos de la Muerte…”.
Salonika… Sivdad nombrada komo el “Yerushalayim de los Balkanes”, ke kontava syenes de miles de almas. En 1943 los Nazistos deportaron la mas grande parte de la Populasyon Djudia de Salonika. La Shoa no solo mato milaryas de personas ma, tambien destruyo una grande Kultura.
