Segun lo ke meldamos en la prensa, Mohammad Javad Zarif, ministro İranyano de las kestyones estranjeras, afirmo alhad el 2/2/2014 en la Televizyon Almana ke la eksterminasyon de djudyos durante el rejimen Nazi fue una krual trajedia ke no deve mas nunka reproduzirse. El disho:
“No tenemos nada kontra los djudyos, al kontraryo tenemos el mas grande respekto por eyos al interyor del Iran i tambyen al eksteryor.”
De su parte, kontraryamente a su predesesor Mahmud Ahmadinejad ke avia nyegado la Shoah, el Prezidente aktual Hasan Rohani kondena el masakro de djudyos por los nazis.
Por kontra, Mohammad Javad Zarif afirmo tambyen dia de alhad ke son los derechos de los palestinyanos ke son trespizados desde 60 anyos por Israel, el kual utiliza la taktika del “ecran de humo”.
Konsernando la kestyon Nuklear, el Ministro disho ke Teheran dezea romper ‘el sirkulo visyozo’ i utilizar todos la medyos posivles afin de instorar la konfiansa, ma ke nunka akseptara de resivir ordenes de otros.