En mi teksto presedente avlimos un poko sovre los raportos entre las ermueras (yernos) i esfuegras. Tokimos un poko i al sujeto de koabitasyon i sus probavles konsekuensas. Pensi ke, esta semana seriya bueno de analizar otrun poko la kestyon antes de pasar a otra. Fue ansi ke preferi kontinuar kon este sujeto ke eskoji para oy.
Es verdad ke en syertas sirkumstensyas, en algunos kavzos, es posivle ke muevos kazados moren djuntos kon los paryentes. Afilu, yo digo en syertos kavzos es kaji ovligatoryo ma de dinguna manerano rekomandavle. Me esto rendyendo kuento ke el byervo “ovligasyon” no esta muy simpatiko, ma es reel.
Es muy natural ke dos jenerasyones teniendo diferentes konsepsyones de vida, uzansas o maneras kontradiktorias, sientan difikultad a akomodarsen. Siguro ke ay eksepsyones. A parte de unas, kuantas eksepsyones muy ralas en muestros diyas, es difisil de enkontrar muevos kazados bivyendo kon los paryentes, ke reushen a alkansar una syerta armonia, mizmo si no es perfekta. Esto deve ser la vanda pozitiva de la kestyon. No mos olvidaremos ke ay i la parte negativa, ke reflekta la realidad de la vida. Devemos achetar esta realidad, si keremos o no.
En keriendo dar egzempyos ke konosi o sinti, naturalmente no kero egzajerar. Puedemos dar de muevo el egzempyo de una mueva kazada. Eya puede no saver gizar muy bien, o manka de eksperiensa en el rijir una kaza. Reelmente esto no es grande problema si biven solos.
Supozaremos ke los muevos kazados empesan a bivir endjuntos kon los paryentes. Despues de un syerto tyempo, todas las dos partes ampesan a sintir un dezrepozo... Ay komo una “tansiyon” en la atmosfera. De una manera o otra, seya los mansevos, seya los adultos ampesan a sintir komo una sorte de “agresividad” resiproka.
Esto rendyendome kuento keridos lektores ke este byervo tambien no es muy simpatiko. En realidad, son munchas vezes en kozikas chikas, en bavajadas ke ampesa el dezakordo. De parte a parte se bushkan faltas i lo ke es mas grave i los mansevos, eyos tambien ampesan a no entendersen muy bien. Porke, mankan de la “entimidad de un chiko nido a dos”, del romantizmo ke arranja las kozas.…Esto es mi opinyon.
Ya es verdad ke yo so kontra la koabitasyon. Ma la situasyon ekonomika de las famiyas, o puede ser syertos uzos tradisyonales ke, mizmo syendo muy ralos, portanto egzisten oy en diya, no permeten de avrir una mueva kaza. Si ay talos ovligos, lo mijor es de provar un arranjamiento. Siguro, para mi es muy fasil de dizir esto!!. Ay otruna solusyon, mas radikala.Kuala?... No realizar esta union en kavzo ke no egziste sentimientos fuertes entre los mansevos. Ke bueno seriya de ver “Realidad de la vida” lado kon lado kon el “Romantizmo”!!
Si los mansevos realizan ke los paryentes keren kalmo i trankilidad, deven tener una buena doza de kompreasyon i achetar syertas kozas. Deven auzarsen a la idea ke son mas o menos una kavza de trokamientos en la vida abituala, en los uzos de los grandes. Chikos i grandes, kon takto, kon buena veluntad, deven tomar parte en los echos i menesteres de la kaza.
Esto lo esto afirmando bazandome sovre kavzos ke konosi de serka. Mizmo si los paryentes son los mas dulses i avenidos padre i madre, los mansevos pueden tener en vezes menester de una diplomasiya fina para no deranjarlos muncho. Komo lo dishe mas arriva, de una manera estan trokando sus “abitudes”, sus modo de vida.
Bueno…vinyendo a los paryentes…İ eyos deven akodrarsen ke tuvyeron tambien vente anyos i pasaron puede ser (syertos) por este kamino. Deven renderse kuento ko sus ijos o ijas nesesitan un poko de entimidad, son menos a sus lados. İ, en la mezura del posivle deven detenersen de azer remarkas i kritikas. Es a los grandes ke kaye de mostrar a los mansevos mas muncha tolerensya i entendimiento, kualidades i sezudeza de la maturidad.
