Desde unos kuantos dias, en Fransya, el kavzo ‘Dieudonné’ esta provokando en la opinyon publika un djenero de rebuelta kaji kaotika konsernando la prosedura utilizada para anular la prezentasyon de las pyesas de teatro de este komedyano, las kualas son empapadas de un odyozo antisemitizmo.
No savemos lo ke seran las konsekuensas de la desizyon del ministro del İnteryor Franses ‘Manuel Valls’ (atestiguada por el Konsilyo de Estado ke es la mas alta Institusyon administrativa del payis) de interdir djueves pasado, la prezentasyon de la komedia de Dieudonné intitulada “Le Mur” (la pared), la kuala kontyene palavras desgradantes ke pueden pushar los espektatores al aborresimyento rasyal, ovra ke tambyen aze la apolojia de las diskriminasyones, persekusyones i eksterminasyones perpetradas durante la Segunda gerra mundyal kontra muestro puevlo..
Segun lo ke meldamos, aun ke kada reprezentasyon teatral de Dieudonné es un desvelopamyento del antisemitizmo, la manera muy fuerte de proseder del Ministro del İnteryor puedra provokar reaksyones violentes de parte de varyas İnstitusyones ke defenden (a ke presyo ke sea) los prinsipyos de la Libertad de konsyensya i de ekspresyon.
Inkontestavlemente, estos preseptos ke figuran en la deklarasyon de los derechos del ombre son sakros i konstituen la baza mizma de la sivilizasyon…. ‘Libertad de kreensa kuala sea esta kreensa, kristyana, muzulmana, djudia, Budista, mizmo ateista i tambyen libertad de ekspresyon’.
Ma asta ande puede ir esta libertad? Todos savemos ke ‘la ekstrema limite de la libertad de ekspresyon de kualkyer persona es la linya ande empesa la dinyidad del otro’ lo ke egzije el respekto de kual indeviduo ke sea.
No mos olvidaremos ke en kada derecho ke mos es akordado egziste el premisyo de un dover de resiprosidad i de una egzijensya de ekilibro. A este propozito, egziste en Fransya la Ley nombrada ‘La loi Gayssot’ ke va asta prohibir legalmente el antisemitizmo i el negasyonizmo.
Es ke ‘este respekto de la libertad i de la dinyidad del otro’ egziste en las ovras de Dieudonné? – Por seguro no, eyas son la negasyon mizma de estas dos grandes valores humanas
En una konversasyon ke tuve kon muestra konsivdadina Dr. Lydia Albukrek, eya me disho kon razon ke en la atmosfera konfuza ande el mundo se topa aktualmente, este djenero de ovras humoristikas konstituen una eksplotasyon de espritos perturbados por kompleksos de inferyoridad i kovdisya.
El politologo Jean-Yves Camus estima ke Dieudonné se topa a la ultima limite entre la politika i el ‘show business’ ke es un djenero de merkantilizmo sordide.
El sosyologo Michel Wieviorka lo konsidera komo el portatador de un muevo antisemitizmo ke se desvelopa en los pro-palestinyanos radikalistos i insiste sovre el rolo preponderante del İnternet ke les ofrese un publiko virtual.
En el espasyo de vida ke mos es akordado, aga D.io ke la konsyensya de muestra responsabilidad pushe syempre muestros pasos en direksyon de la Verdad i de la Ekidad.
P.S. Lunes el 13/1/2014, Dieudonné fue autorizado a prezentar una mueva pyesa intitulada ‘Asu Zoa’ limpya de kualkyer termo kontra los djudyos.
