Deklarasyones ke se kontredizen:
Segun John Kerry ay progresos en las negosyasyones Israelo- palestinyanas.El deklaro alhad pasado el 5 del mez koryente, ke los Estados Unidos prezentaran un plano de paz djusto i ekilibrado para Israel i los palestinyanos.
Por kontra el Ministro İsraelyano de las relasyones internasyonales ’Youval Steinitz’ izo saver ke Israel no akseptara ninguna propozisyon Amerikana konsernando la Seguridad del Yordan.
“La Seguridad de Israel deve kedar en muestras manos. Todos los ke propozan una solusyon ke konsiste a kargar de este kudyo una fuersa internasyonal o palestinyana, no entyenden nada konsernando la situasyon en el Oriente Medyo”
De su parte, Benyamin Netanyahu egzije kel futuro Estado Palestinyano sea desmilitarizado i ke Israel pueda mentener una prezensya militarya por un largo tyempo sovre la frontyera kon la Jordania.
El antisemitizmo en Fransya
En Fransya el sinyo nombrado ‘La quenelle’ ke es interpretado komo un saludo nazi antisemito esta kontinuando a azer grande ruido en la komunidad djudia, komo tambyen en el payis entero el mizmo.
El Ministro del İnteryor Manuel Valls ansi kel presedente Ministro del Eksteryor Alain Juppe penan a azer anular todas las reprezentasyones humoristikas del komedyano Dieudonné ke se topa a la kavesa de este movimyento antisemito.
Por kontra la gazeta Israelyana Haaretz parese ser muncho mas kalma i prekoniza simplemente una edukasyon adekuada, lakuala (segun eya) sera muncho mas efikas.
El estado de salud de Ariel Sharon se esta desgradandose de dia en dia mas
Segun la prensa Israelyana, atado desde unos kuantos anyos a makinas ke lo azen artifisyalmente bivir en un estado de kompleta inkonsyensya, el disfunksyonamyento de sus organes vitales devyene aktualmente de dia en dia mas grave.
A este propozito, un gazetero disho ‘D.io save solo lo ke puedra akonteser’.
El sentro Salti fyesto su dyezen aniversaryo
Es kon grande plazer ke mos ambezimos kel Sentro Salti en Israel fyesto su dyezen aniversaryo, un lavoro de grande valor i de grande utilidad.
Felisitamos kalorozamente Naime i Selim Salti por todo lo ke izyeron i azen syempre en favor de la lingua i kultura de muestros antepasados i les oguramos anyos largos de vida yenos de alegria, reushita i logro.
El link para meldar las palavras ke pronunsyo Selim Salti es el sigiente: https://www.youtube.com/watch?v=Y9SD6hBzmn8
El prezidente de la komisyon Itahdut Aliya Yotse Turkiya, Moiz Sustiel rekompensado.
El prezidente de la komisyon Itahdut Aliya Yotse Turkiya, Moiz Sustiel ke asume grasyozamente la karga de ayudar la adaptasyon de los Ole Hadashim ke vyenen de Turkiya fue rekompensado i onorado de parte de ‘Sofa Landver’ ministre de la Aliya i de la integrasyon.
Todas muestras felisitasyones al sinyor Moiz Sustiel
