Moabet sovre ermueras i esfuegras

Bienvenida 2014

Sueto ke el anyo 2014 seya manadero de la realizasyon de muestras esperansas asigun el dezeyo de muestro korason! 

P.S. Mi Teksto sovre el muevo anyo en

“El Amaneser” No.107 P.6

Al pareser ke mos nasyo otrun diya para selebrar! O, puede ser ya egzistiya i yo no estuve al koryente tanto tyempo! Es lo ke es, antes unas, kuantas semanas, en bushkando un program enteresante, meldi en “pasabolante” en el ekran : “El 27 de Oktubre es el Diya de las esfuegras”. Sinseramente, kedi un momento sin entender lo ke keriya dizir este anunsyo. Pensi en primero ke esto deviya ser una shaka.

Portanto, yo tomando el anunsyo  en konsiderasyon ampesi a eskrivir estas linyas.  Asperi asta la fin de Oktubre para ver si reelmente iva aver  un diya semejante o no. A mi grande regreto no uvo ni boz ni siman de un diya semejante. Pekado!! las esfuegras, ivamos a tener la okazyon de fyestar este diya!! En todo kavzo keridas amigas, lo ke ay de pozitivo en este chiko embrolyo, es ke me dyo la idea de una mueva okazyon de azer moabet. 

Se puede eskrivir muncho sovre el sujeto ke eskojimos oy… Sovre las relasyones ke egzisten entre yernos, ermueras, esfuegras ets…i mizmo entre kosfuegros. Son muy diferentes en kada famiya i famiya. Es difisil de analizarlos uno por uno. En jeneral, puedo dizir ke ay de todas las kolores!.. Unos son muy kordiyal, avenivles i amistozos. Otros son un poko mas ofisyel,  ma afavle. İ otros malorozomante son diskordantes, dezavenidos sin ir naturalmente asta la enemistad. O, ken save!??, puede ser en vezes...

Esfuegra i ermuera…No entyendo porke, kuando se nombran estas dos personas ay komo una ola negativa. No kero tokar en ancho a los raportos ermuera-esfuegra ke, mas o menos son komo los del paragrafo presedente. Yo konosko munchas esfuegras ke son amistozas  kon sus ermueras i se avyenen komo madre i ija. Es yerro de pensar ke kada madre de ijo, lo sela i no dezea partajarlo kon otra. Siguro ke ay eksepsyones, lo ke es en la natura de las kozas…

Aki kero avlar un poko de la “koabitasyon”. Es posivle ke muevos kazados moren endjuntos kon los paryentes en perfekta armonia? Yo digo, en syertos kavzos la koabitasyon puede ser ovligatorya (ay munchas razones), ma de dinguna manera rekomandavle. Asigun mi, los dezavenimientos entre ermuera i esgfuegra se remarkan menos kuando los mansevos moran solos. A parte de unas, kuantas  eksepsyones muy ralas, es difisil de ver muevos kazados bivyendo kon los paryentes, ke reushen a alkansar a un akordo kompleto. Para impedir situasyones dezagradavles, kada uno deve dar konsesyones. Es muy normal ke las dos jenerasyones tengan uzansas o modos de vida diferentes. Ansi, tienen syertas difikultades a akomodarsen.

Visto mi edad i mi fakultad de observasyon! (no es por alavarme!!) me syento el derecho de eskrivir estas linyas. Por egzempyo, una novya, puede no saver bien gizar al presipyo, lo ke no es grande problema kuando biven solos. Afilu se burlan de la komida kemada o mal kocha. Ma, la esfuegra, (no todas orozamente!!) en estas kondisyones, se va amanziar por su ijo ke era tan bien mirado antes de kazarse!! La gerra ampesa kon los konsejos de la esfuegra. Si la ermuera los syente, los pratika kon buena veluntad, no ay problema. En kavzo kontraryo kualo puede azer el povereto del mansevo?! Defender su madre o su amor??...

No kero ni imajinar el rezultado!!.. Keridos amigos, orozamente ke esto es solo un moabet, una fanteziya diremos. Portanto esto sigura ke munchos de los lektores van a topar una partida de la realidad de la vida en lo ke eskrivi.  Ma, viene el momento ande las mansevas depasan las madres o las esfuegras en el “Arte Kulinaryo” i en la direksyon del nido. Azen maraviyas. Esto lo esto afirmando en “connaissance de cause”, komo dizen los fransezses. En kurto, yo digo ke es a los paryentes de mostrar a los mansevos sus sezudeza en syendo tolerentes i pasensyozos. Komo dize el proverbo turko “Ne ekersen onu biçersin”, lo ke sinyifika “Arrekojes lo ke  sembras”. Kedad en buena ora, keridos lektores.